وسى قىمىز قازاققا
ماقتانىڭ با، اسىڭ با؟
قىمىزدى باسار ارتىنان
ەت دايار ما قاسىندا؟
بويىڭا ءسىڭىپ، ۋەرد بولعان
قىزبا باستىق جاسىندا.
قىزىلشىل سەمىز، جاز قىمىز
ءبىر ۇلكەن بورىش باسىڭدا.
جۋاستى ءمىن دە، ايران ءىش،
جوق نەمەگە شاتىلما.
ۇرى، زالىم، قۋلارعا
نىساناعا شانشىلما.
جىلقىنى اندىپ ۇرى ءجۇر
ءار توبەنىڭ تاسىندا.
وي كوزىمەن قاراساڭ،
قويدان جىلقى اسىل ما؟
ماقتانعا بولا جيام دەپ،
جىلقى ءۇشىن جۇرتقا باس ۇرما
قىمىز، سەمىز دەگەنىڭ
ءبىر ماقتان عوي، جاسىرما.
ماقتان قۋما، كەرەك قۋ،
ويسىزدارعا قوسىلما.
قويىندا اقشا، قولدا قوي
كۇزەتكە وڭاي، شوشىنبا!

---