پۋتين يادرولىق سوعىس باستايمىز دەپ قورقىتتى

13 ناۋرىزدا رەسەي پرەزيدەنتى ۆلاديمير پۋتين رەسەيدىڭ يادرولىق سوعىستى باستاۋعا تەحنيكالىق دايىن ەكەنىن ايتتى. «اسكەري-تەحنيكالىق تۇرعىدان العاندا، ءبىز، ارينە، دايىنبىز. ولار (ياعني، يادرولىق كۇشتەر) ۇنەمى جاۋىنگەرلىك ازىرلىك جاعدايىندا»، - دەدى پۋتين تەلەجۇرگىزۋشى دميتريي كيسەليەۆكە بەرگەن سۇحباتىندا.

 

رەسەي فەدەراسياسىنىڭ باسشىسى اتاپ وتكەندەي، وسى ۋاقىتقا دەيىن ۋكرايناعا قارسى سوعىستا تاكتيكالىق يادرولىق قارۋدى قولدانۋدىڭ قاجەتتىلىگى بولماعان. كيسەليەۆ ءپۋتيننىڭ باسىنا نەگە مۇنداي وي كەلمەگەنىن سۇرادى. «جوق، نەگە؟» دەپ جاۋاپ بەردى رەسەي باسشىسى.

 

پۋتين ەگەر رەسەيدىڭ مەملەكەتتىك شەكاراسىنا، ەگەمەندىگى مەن تاۋەلسىزدىگىنە ءقاۋىپ تونسە، بۇل ەل يادرولىق قارۋدى قولدانۋعا ءماجبۇر بولاتىنىن اتاپ ءوتتى. «ءبىزدىڭ ستراتەگيامىزدا ءبارى جازىلعان، ءبىز ونى وزگەرتكەن جوقپىز»، - دەپ قوستى پۋتين.

 

ءپۋتيننىڭ ايتۋىنشا، رەسەيلىك يادرولىق ۇشتىك قازىرگى ۋاقىتتا الەمدەگى ەڭ زاماناۋي بولىپ تابىلادى. امەريكا قۇراما شتاتتارى دا يادرولىق الەۋەتىن دامىتۋدا. ونىڭ ۇستىنە ولار يادرولىق سىناقتار جاساسا، رەسەي دە سولاي جاسايدى.

 

«اقش-تىڭ يادرولىق سىناقتارىن وتكىزۋ مۇمكىندىگى جاڭا وقتۇمسىقتار پايدا بولعان كەزدە، كەيبىر ساراپشىلاردىڭ پىكىرىنشە، ولاردى تەك كومپيۋتەردە سىناۋ جەتكىلىكسىز، ولاردى تابيعي تۇردە سىناۋ قاجەت. بۇل اقش-تاعى بەلگىلى ءبىر ورتاداعى يدەيالار، ولار قالقىپ ءجۇر، ولاردىڭ ورنى بار. ءبىز بۇل تۋرالى بىلەمىز. ءبىز دە باقىلاپ وتىرمىز»، - دەدى پۋتين.

 

ءبىراق، ءبىزدىڭ پىكىرىنشە، پۋتين يادرولىق قارۋدى پايدالانۋعا بارمايدى. سوعان بىرنەشە سەبەپتەر بار.

ءبىرىنشى سەبەپ – ءپۋتيننىڭ سىرتقى ساياساتىنىڭ نەگىزى – بوس بىلشىل (بلەف). ءسىز ۇزاق ۋاقىت «بلەف» جاساي الاسىز، ءبىراق، ۋاقىت وتكەن سايىن ولار سىزگە سەنۋدەن قالادى. پۋتين «رەسەيلىكتەرمەن بىرگە جۇماققا بارۋعا» دايىن ەكەنىن ايتتى. ءبىراق، ءقازىر ول ءوزىنىڭ وسى ءسوزىن ۇمىتتى. ءارى ءوزى دە جۇماققا ۇمتىلمايتىنى انىق.

ەكىنشى سەبەپ – ۋكراينا جورىعى رەسەي ارمياسىنىڭ السىزدىگى مەن وسالدىعىن كورسەتتى. ەكى جىل استام ۋاقىت ءوتتى. كرەملدىڭ اۋەلدەگى جوسپارىنىڭ تاس-تالقانى شىقتى. ال ۋكرايندار بىرتىندەپ رەسەي قورعانىسىن زەرتتەي باستادى. ءساتتى قارسى شابۋىلدارعا شىقتى.

ءۇشىنشى سەبەپ – اقش-تىڭ ەسكەرتۋى. پۋتين يادرولىق سوعىس تۋرالى ايتا باستاعاننان كەيىن اقش-تان ەسكەرتۋ الدى. اقش ءباسپاسوزى جازعانداي، پۋتين تاكتيكالىق يادرولىق قارۋ قولدانىلعان جاعدايدا ونىڭ رەسەي اۋماعىنداعى بارلىق بۋنكەرلەرى جويىلاتىنىن ەسكەرتىلدى. ال رەسەي اۋماعىندا ونداي بۋنكەرلەردىڭ ونشاقتىسى بار.

ءتورتىنشى سەبەپ – رەسەي ارمياسىنىڭ كۇش-قۋاتى، جەڭىلمەيتىندىگى تۋرالى كۇنى-تۇنى ايتىلدى. ءبىراق ۋكرايناداعى سوعىس بۇل دوكتريناعا كۇمان كەلتىردى. سونىمەن قاتار، ناتو اسكەرلەرىنىڭ كۇشى جويىلعان جوق. «الەمنىڭ ەكىنشى ارمياسى» دەپ اتالاتىندار ناتو اسكەرىمەن كۇش سىناسقىسى كەلۋى ەكىتالاي.

وسىلايشا، ءپۋتيننىڭ «قىزىل تۇيمەنى باسۋعا» باتىلى بارمايدى. ءپۋتيننىڭ ءوزىن-وزى ساقتاۋ ينستينكتى جەتكىلىكتى دامىعاندىقتان، ونىڭ يادرولىق ماسەلەدە باسقا ەلدەردىڭ كۇشىن سىناۋى ەكىتالاي.

 

 

You Might Also Like