ساۋلەڭ بولسا كەۋدەڭدە،
مىنا سوزگە كوڭىل ءبول.
ەگەر ساۋلەڭ بولماسا،
مەيلىڭ ءتىرىل، مەيلىڭ ءول.
تانىماسسىڭ، كورمەسسىڭ،
قاپتاعان سوڭ كوزدى شەل.
يمامسىزدىق نامازدا —
قىزىلباستىڭ1 سالعان جول.
كوپ شۋىلداق نە تابار،
بيلەمەسە ءبىر كەمەل؟
بەرەكەلى بولسا ەل —
جاعاسى جايلاۋ ول ءبىر كول.
جاپىراعى جايقالىپ،
بۇلعاقتايدى سوقسا جەل.
جان-جاعىنان كۇركىرەپ
قۇيىپ جاتسا اققان سەل،
ونىڭ مالى وزگەدەن
وزگەشە بوپ وسەر تەل.

بەرەكەسى كەتكەن ەل —
سۋى اشىعان باتپاق كول.
قۇس قاڭقىلداپ، جاعالاپ،
سۋلاي الماس جازعى ءتول.
ونىڭ سۋىن ىشكەن مال
تىشقاق ءتيىپ، اسپاس بەل.
كول دەپ ونى كىم جايلار،
سۋى قۇرسىن، ول ءبىر – ءشول.
ەدينيسا – جاقسىسى،
ەرگەن ەلى بەينە ءنول.
ەدينيسا ءنولسىز-اق،
ءوز باسىندىق بولار سول.
ەدينيسا كەتكەندە،
نە بولادى وڭكەي ءنول؟
بەرەكەڭدى قاشىرما،
ەل تىنىش بولسا، جاقسى سول.
راس سوزگە تالاسىپ،
اقجەم بولما، جانىم، كەل!


1 قىزىلباستار – قىزىلباشي (تۇرىكشە) – يران جەرىندەگى كوشپەلى تۇرىكتەردەن قۇرىلعان، شاح يسمايل ءبىرىنشى مەملەكەتىنىڭ ەڭ باستى كۇشى بولادى. قىزىلباستار اسكەري جاۋىنگەرلەرىنىڭ ەرەكشەلىك بەلگىسى – ون ەكى قىزىل جولاقتى سالدە بولعان. پارسى جۇرتىن قىزىلباستار دەپ اتاۋ وسىدان شىققان.

---