سەن مەنى نە ەتەسىڭ؟
سەن مەنى نە ەتەسىڭ؟
مەنى تاستاپ،
ونەر باستاپ
جايىڭا
جانە الداپ،
ارباپ،
ءوز بەتىڭمەن سەن كەتەسىڭ.
نەگە اۋرە ەتەسىڭ؟
قوسىلىسپاي،
باسىلىسپاي،
بايىڭا
جانە جاتتان باي تاپ،
ءومىر بويى قور ەتەسىڭ.

ەت جۇرەك ورتەندى،
وت بوپ جانىپ،
جالىن شالىپ ىشىمە.
يتتەي قورمىن، زارمىن،
سەن ءۇزدىڭ عوي بۇل جەلكەمدى.
كىم بىلەر ەرتەڭدى؟
ءولىم ايتپاس،
كەلسە قايتپاس
كىسىگە.
بۇگىنگى كۇن
بارمىن،
جولداس ەتتىڭ سەن بوتەندى.

عاشىقتىق – قيىن جول.
جەتسەڭ – جەتتىڭ.
جەتپەي ءوتتىڭ،
نە بولدى؟
ارماندا ءومىر
ءوتتى،
ويلار ما ەكەن ءبىر مەنى سول؟
سالدىراپ اياق-قول،
جەتپەي سەرتكە،
ءىشىم دەرتكە
تەز تولدى.
اجال ۋاقىتى
جەتتى،
مەن ولەيىن، سەن ساۋ-اق بول.

شىن جۇرەك – ءبىر جۇرەك،
قايتا تولقىپ،
جولدان قورقىپ
اينىماس،
شەگىنىسىپ
قايتپاس،
ولسە ءبىر سوزبەن، نە كەرەك؟
بىلەسىڭ، سەن زەرەك،
مەن پاندەڭە،
بولدى دەمە،
كەل، قاراس.
ەشكىم سوگىس ايتپاس،
راحىم قىلساڭ، كەل ەرتەرەك!

شىن عاشىق مەن ساعان!
كەيىپ جۇرسەم،
سەنى كورسەم،
ءلام-ميم دەپ
ءبىر ءسوز ايتار
حال جوق،
ەرىپ كەتەر بوي سول زامان.
ويىندى سەن ماعان
ءبىر بولمەدىڭ،
تەز كەلمەدىڭ،
مەنى ىزدەپ.
ىشىڭدە ىستىق
قان جوق،
تاس باۋىر جار، بول قوش امان!

جار، سەنىڭ كوڭىلىڭ توق،
اق ەتىڭدى،
نۇر بەتىڭدى
مەنشىكتى
قىلماعان سوڭ
اللا،
ءوزى سورلى ەتسە، امال جوق.
سەن اتتىڭ ءجونسىز وق،
ءتاڭىرى – قازى
تاس تارازى،
تەنتەكتى سۇراماس دەپ قالما،
سەرت بۇزعاننىڭ، ءبىل، ورنى – شوق.


You Might Also Like

جاڭالىقتار

جارناما