![شىعارما: 4 ماۋسىم — رامىزدەر كۇنى (ەل بەينەسى – ەل رامىزدەرى)](http://infohub.kz/uploads/thumbnail/20240527165013548_big.jpg)
- 03 ماۋ. 2024 18:52
- 609
شىعارما: 4 ماۋسىم — رامىزدەر كۇنى (ەل بەينەسى – ەل رامىزدەرى)
تاۋەلسىزدىگىن الىپ، ءتاي-تاي باسقان مەملەكەتىمىزدىڭ ايرىقشا بەلگىلەرى – تۋ، ەلتاڭبا، گيمن. ءار نىشاندا وزىندىك ءومىر سالتى، ەرەكشەلىگى، مۇراتى بار. بۇلار تەك قانا بەلگىلەر عانا ەمەس، قازاق ەلىنىڭ، قازاق جەرىنىڭ قاسيەتتى يدەياسى. بۇل بەلگىلەردى كورگەن ادام ءوز ەركىندىگىن جانە بىرلىگىن سەزىنەدى.
مەملەكەتتىك تۋ
اسپان تەكتى، كوك ءتۇستى تۋىمىز كەزدەيسوق تاڭدالعان جوق. ايگىلى ارسەلم كەستەسى بويىنشا، كوك ءتۇس – ادالدىقتىڭ، كىرشىكسىز تازالىقتىڭ، پاكتىكتىڭ بەلگىسى. سونىمەن قاتار، كوك ءتۇس اشىق اسپان رەڭىنە ساي بولعاندىقتان، حالقىمىزدا بۇل ىنتىماق پەن بىرلىك، تۇراقتىلىق، بەرەكە-بايلىق بەلگىسى بولىپ سانالادى. تۋدىڭ قاق ورتاسىندا كۇن بەينەسى ماڭگىلىك ءومىردى جانە تىرشىلىكتى بىلدىرەدى. ال قىران – ارمان، ماقسات، مۇرات، ازات كۇن، كەڭ بەينە. مۇنىڭ ءبارى ءبىر تۇتاسقا اينالعان كەزدە زور باقىتتىڭ سيمۆولى.
مەملەكەتتىك ەلتاڭبا
ەلتاڭبا كوگىلدىر ءتۇس اياسىنداعى شاڭىراق بەينەسىندە بەينەلەنگەن. بۇل – وتانىمىزدىڭ وشاعى، ءبىرتۇتاستىعى، باستاۋى. شاڭىراقتى اينالا تۇرعان ۋىقتار كۇن ساۋلەسىندەي جارقىرايدى. ەكى جاعىنداعى اڭىز ەرتەگىلەردەگى قاناتتى پىراقتار تاۋەلسىز قازاقستاننىڭ ماڭگىلىك ءومىرى مەن شەكسىز دامۋىنىڭ بەلگىسى. قازاق جەرىنىڭ، كوپ ۇلتتى ەلدىڭ رۋحاني بايلىعىن كورسەتەدى. پىراقتاردىڭ قاناتتارى بولاشاقتىڭ ەرتەڭى جاس ۇرپاقتىڭ ارمانى بيىككە سامعاۋ تالابى. ەلتاڭبا ماڭدايىنداعى جۇلدىز «باعىمىز اشىلىپ – جۇلدىزىمىز جانا بەرسىن» دەگەن اسىل ارمانىمىزدى كورسەتەدى. جۇلدىزدىڭ بەس بۇرىشى قازاقتىڭ كەڭ پەيىل قۇشاعىنداي بەس قۇرلىققا تەڭدەي.
مەملەكەتتىك گيمن
ەلىمىزدىڭ مۋزىكالىق ەمبلەماسى – گيمن. بۇل – قازاقتىڭ باسقا ەلدەرگە دەگەن اق نيەتتى سالەم حاتى. گيمننىڭ ءار ءسوزى – ەلىمىزدىڭ نامىسى، ارىمنىڭ ايناسى. گيمندى تەك قانا ەستىپ قانا قويماي، قوسىلىپ ايتقاندا بويىڭدا ەرەكشە ءبىر ۇلاندىق، ازاماتتىق سەزىم تۋىندايدى. بۇل سەزىمدى سەزىنۋ – ۇلكەن باقىت، ماڭدايعا بىتكەن ب ا ق.
وسىنىڭ ءبارىن ساناسىنا قوندىرا بىلگەن ادام ەلىمىزدىڭ ەرتەڭى ءۇشىن ايانباي ەڭبەك ەتۋى، ءوقىپ-بىلىم الۋى، قازاقستاننىڭ ىرگەتاسىن بەكىتۋى ءسوزسىز. تاۋەلسىز قازاقستاننىڭ ءاربىر ازاماتى رامىزدەردى قۇرمەتتەپ، ولاردى ۇلىقتاۋى – ەلىمىزدىڭ بىرلىگى مەن تۇراقتىلىعىنىڭ كەپىلى. رامىزدەر ارقىلى ءبىز ءوزىمىزدىڭ تاريحىمىزدى، مادەنيەتىمىزدى جانە بىرەگەيلىگىمىزدى الەمگە پاش ەتەمىز.