«تاڭ» جۋرنالىنا جاڭا انمەن بايعازى
جاڭا ويدان
شىعارعان
ءبىر بولەك بۇل ءان،
جاقسى ءۇندى،
ۇعىمدى
جاس كەرەك بۇعان.
تولعا، شىرقا بايقاپ جاس جۇرەك.
انشىلەردەن سول تىلەك.

جورعالات،
سورعالات،
مۇڭداندىرىپ، تامىلجىتىپ سال.
بويدى ەرىت،
وي كەڭىت،
اسەر بەرىپ، تىڭشى جانىن بيلەپ ال!

بوس ايعاي،
قۇر ويباي –
ءان دەمە، ويلا،
ءتۇز-دامسىز،
تۇك ءنارسىز
اس جەمە تويدا.
جاسىق ەتتەن قانداي پايدا بار،
بولماس وندا ءتاتتى ءنار.

ۇيقاستى،
سيپاتتى
ىشكى سىرلى جىرىڭدى انگە قوس،
ءسوزى – جان،
ءانى – ءتان،
جاراسىمدى بولسا، تىڭدار ونى دوس.

جىرشىلار
ءان سالار،
تولعانىپ ويدان.
مۇڭلى زار
قوزعالار
بايقالىپ بويدان.
جانىڭنان ءبىر مايدا سىر شىعار.
سەزىمى وياۋ ونى ۇعار.

ءتىل بيلەپ،
ءۇن كۇيلەپ،
سۋرەتتەسە ءومىر جايىن ءان،
مۇڭلاتسا،
شىرقاتسا،
ەنتەلەتسە، ويانباي ما ولگەن جان؟

جاڭا ءانىم –
بايعازىم،
قۇتتىقتاپ جۋرنال،
كارى جان،
سالىپ ءان،
جىبىرلاپ قوزعال.
الدىنان شىق مايدا ءان سالا،
قابىل السىن جاس بالا.

دومبىرا ال،
انگە سال،
شىلدەحانا كۇزەت ەندى سەن.
ەرجەتسىن،
تەربەتسىن
ەلدى جاڭا، نۇرلى، اسەرلى سوزىمەن.

تولقىنعا،
قۇلقىنعا
سوقپاس بۇل جاس.
زورلىقتان،
قورلىقتان
توقتاسىن جولداس.
ەركىندىكپەن ءوسىپ كوپ جاسا،
ەل قامىڭدى ويلاسا.

قالامدى،
تاباندى
جاستار، جاتپاي جاقسى ءسوزدى جاز،
ەمدەلمەي،
جوندەلمەي،
باسىن اشپاي، سورلى ەلىڭدى قىلما تاز.

تىلمەنەن،
پۇلمەنەن
كومەكتەپ، قولدا،
ءار بويعا
سونى ويلا،
ساراڭ بولما.
جاردەمىڭنەن جاسقا تولار ول.
اداسقانعا تابار جول.

بولما قور،
ءۇمىت زور،
حات بىلگەنىڭ الىپ وقى، بار.
كوكسەگەن،
جەتپەگەن
ويىڭ سەنىڭ ۇيرەنەدى تالاي زار.


You Might Also Like

جاڭالىقتار

جارناما