Алматы тұрғыны көлігінің алдыңғы орындығында жатқан заттары үшін айыппұл алды: камера оларды байланбаған жолаушы деп қате таныған болуы мүмкін, деп хабарлайды infohub.kz сайты.
Евгения Шестакова әлеуметтік желіде камера жолаушы тасымалдау ережесінің бұзылғанын тіркегенін, алайда алдыңғы орындықта тек жеке заттары болғанын айтты. Қаулыға қоса тіркелген суретте сөмкелер мен басқа да заттар көрінеді. Көлік иесінің пікірінше, жүйе оларды байланбаған жолаушы деп қате таныған.
«Шынын айтсам, бүгін таңертең айыппұл туралы хабарламаны көріп қатты таңғалдым. Ал қаулыны ашып, көзіме өзім сенбедім. Енді, алдыңғы жолаушы орнында жатқан сөмкелер мен пакеттерді де байлау керек сияқты. Маған үлкен ақ пакетке байланысты айыппұл салынды. Иә, ол көлемді, бірақ адамға мүлде ұқсамайды. Әсіресе суретте қарапайым пакет екені анық көрініп тұр. Сондықтан, құрметті қазақстандықтар, енді тек жолаушыларды ғана емес, сөмкелер мен пакеттерді де байлауға тура келетін сияқты — кем дегенде, айыппұлмен айналысқыңыз келмесе», — деп пікір білдірді Евгения.
Көлік иесі айыппұлды дауламақ, себебі камера салондағы заттарды байланбаған жолаушы деп қате таныған деп есептейді.
Адвокат Жандос Палманов бұрын түсіндіргендей, жүргізушілер бірнеше жағдайда қаулыға шағымдана алады: жауапкершілікке тарту тәртібі бұзылса, көлік иесінің деректерінде қате болса, көліктің мемлекеттік тіркеу нөмірі дұрыс анықталмаса, бұзушылықтың жеткілікті дәлелі болмаса, камераның жарамдылығына күмән туса немесе фото және бейнежазбалар айыпталған бұзушылықты растамаса. Сарапшы әр жағдайды жеке бағалау қажет екенін атап өтті.
Адвокаттың айтуынша, әкімшілік құқық бұзушылық туралы қаулыға оны алған немесе табыс еткен күннен бастап 10 тәулік ішінде шағымдануға болады. Мерзім өтсе де, шағымдану құқығы жоғалмайды: дәлелді себептер болса, уәкілетті органға немесе сотқа өтініш беріп, мерзімді қалпына келтіруге болады. Заңгер шағым беруден бұрын қаулыны мұқият зерделеп, бұзушылықты тіркеудің барлық материалдарын сақтап, өз дәлелдемелеріңізді — бейнежазбаларды, суреттерді, куәлардың айғақтарын және басқа құжаттарды жинауды ұсынады.
Шағымды eGov және eOtinish платформалары, Әкімшілік құқық бұзушылықтардың бірыңғай тізілімі (ӘҚБТ) арқылы, сондай-ақ Алматы қаласы Полиция департаментінің Әкімшілік полиция басқармасының әкімшілік тәжірибе бөліміне жеке барып (Байтұрсынов көшесі, 185б) беруге болады.