Бразилияның оңтүстігінде жолаушылар автобусы мен жүк көлігінің бетпе-бет соқтығысуы салдарынан кемінде 21 адам қаза тауып, тағы төртеуі жарақат алды. Бұл туралы жергілікті билік өкілдері хабарлады.
Оқиға жергілікті уақыт бойынша таңғы 04:30 шамасында (Гринвич бойынша 07:30) Парана штатының оңтүстігіндегі BR-373 тас жолында болған. Жергілікті БАҚ деректеріне сүйенсек, автобус жақын маңдағы Имбитува қаласының денсаулық сақтау органдарына тиесілі болып, Понта-Гросса қаласына (шамамен 60 шақырым жерде) емделуге бара жатқан науқастар мен олардың туыстарын тасымалдаған.
Екі көліктің соқтығысу себебін анықтау үшін тергеу басталды. Тас жолдың 209-шақырымында болған оқиға орнын сарапшылар мен федералды жол полициясы қызметкерлері тексеріп жатқандықтан, тас жол уақытша жабылды.
Бразилияда жол-көлік оқиғаларынан болатын өлім сирек емес. Дүниежүзілік банктің зерттеуіне сәйкес, 2023 жылы мұндай апаттардан 34 мыңнан астам адам қаза тапқан, олардың көпшілігі мотоцикл жүргізушілері. Зерттеулер көрсеткендей, шамадан тыс жылдамдық, мас күйінде жүргізу және көлік жүргізу кезінде ұялы телефонды пайдалану жиі себеп болады.
Ақпан айында елдің солтүстік-шығысындағы Сеара штатында фестивальға бара жатқан қажылар мінген автобуста 15 адам қаза тапқан еді.