АҚШ-тың Чикаго қаласы мен Индиана штатының солтүстік-батыс бөлігінде толассыз жаңбыр мен қатты желдің салдарынан жарты миллионнан астам адам электр жарығынсыз қалды. Бұл туралы infohub.kz сайты хабарлайды.
Сейсенбі күні аймақты шарпыған қауіпті дауыл аспанды қараңғылыққа бөлеп, штаттар аралығында өте күшті жел тудырды. Иллинойс пен Индианада торнадо дабылы естіліп, Чикагоның екі ірі әуежайында таңғы уақытта барлық рейстер уақытша тоқтатылды. Жеке метеостанциялардың мәліметінше, желдің жылдамдығы сағатына 128 шақырымнан асқан көптеген жағдай тіркелген.
Ұлттық метеорологиялық қызметі бұл дауылдарды «өте қауіпті» деп сипаттады. Әлеуметтік желілерде жолдардың суға толып, ағаштардың электр сымдарына құлағаны және үйлердің шатырларының жыртылғаны көрсетілген фотосуреттер тарады. Чикагоның маңындағы Хоумвуд қалашығында дауыл өткеннен кейін, 54 жастағы Джавид Дженкинс үйіндегі тоңазытқыштағы азық-түлікті сақтау үшін генераторды іске қосуға жанармай іздеп жүргенін айтты.
«Жарық жоқ. Бұл өте қорқынышты болды. Біз жертөледе отырдық», — деді Дженкинс. «Біз қарға, суыққа үйренгенбіз. Бірақ бұған дайын емеспіз».
Poweroutage.us сайтының мәліметінше, Иллинойс пен Индианада 600 мыңнан астам тұтынушы жарықсыз қалған. Индиананың Лейк және Портер округтері, сондай-ақ Чикагодан оңтүстікке қарай орналасқан Иллинойстың Уилл округі ерекше зардап шекті. Шығысқа қарай Огайо штатында 166 мыңнан астам тұтынушы электр жарығынсыз қалды.