Ұлыбританияның Фолкстон қаласында түнде ірі өрт шығып, теңіз жағасындағы қонақүйден жүздеген адам қауіпсіз жерге көшірілді, деп хабарлайды infohub.kz сайты.
Сенбі күні түнгі сағат 1-ден сәл кейін Кент өрт сөндіру және құтқару қызметіне Фолкстондағы The Harbour маңында орналасқан Grand Burstin қонақүйінен өрт шыққаны туралы хабар түсті. Алдын ала дерек бойынша, өрт ғимараттың жертөлесінде тұтанған.
Құтқарушылар шамамен 280 адамды қауіпсіз жерге шығарды. Фолкстон және Хайт аудандық кеңесі зардап шеккендерге қолдау көрсету үшін арнайы орталық ашты. Өрттен зардап шеккендер туралы мәлімет әзірге жоқ, тұтану себебі де белгісіз.
Өрт сөндіру қызметінің хабарлауынша, теңіз жағасындағы қонақүйге 26 өрт сөндіру көлігі жіберілді. Britannia hotels сайтының дерегінше, қонақүй Фолкстон айлағына қарап тұр және 550 бөлмесі бар.
Фолкстон және Хайт аудандық кеңесі әлеуметтік желідегі парақшасында былай деп жазды: «Фолкстондағы Grand Burstin қонақүйінде өрт әлі де жалғасып жатыр. Аумақтан көшірілген адамдар үшін Three Hills Sports Park-та қамқорлық орталығын ашып, зардап шеккендерге қолдау көрсетіп жатырмыз. Апатқа қарсы күш салып жатқан барлық құтқару қызметтеріне және олардың адамдарды қауіпсіз жерге шығару жұмысына қолдау білдіреміз. Маңайда тұратын тұрғындарға кеңесіміз: барлық терезе мен есікті жабыңыз; аумаққа жақындамаңыз және қонақүйге баруға әрекеттенбеңіз; құтқару қызметтерінің нұсқауларын орындаңыз; құтқару көліктері кедергісіз жетуі үшін жолдарды бос ұстаңыз».
Кент өрт сөндіру және құтқару қызметі жаңартылған ақпаратында былай деді: «Фолкстондағы The Harbour маңындағы Grand Burstin қонақүйіндегі өрт орнында он өрт сөндіру көлігі қалды. Тыныс алу аппараттарын киген құтқарушылар өртті бақылауға алу үшін көп еңбек етті, қазір қалған ошақтарды сулап сөндіріп жатыр. Өрт ғимараттың жертөлесінде тұтанған болуы мүмкін, бірақ себебі әзірге белгісіз. Ғимараттан шамамен 280 адам шығарылды, Фолкстон және Хайт аудандық кеңесі қамқорлық орталығын ұйымдастырды. Өртке байланысты зардап шеккендер тіркелген жоқ».
Кент полициясының өкілі былай деді: «Кент полициясына 2026 жылғы 19 қыркүйекте сенбі күні шамамен таңғы 1.20-да Фолкстондағы Marine Parade маңындағы қонақүйде өрт шыққаны туралы хабарлама келіп түсті. Кент өрт сөндіру және құтқару қызметі өртті сөндірумен айналысып жатқанда, қызметкерлер көлік қозғалысын реттеуге көмектесу үшін оқиға орнында тұр».