Франция Иранды супермаркеттердегі тоңазытқыштар мен мұздатқыштардың температурасын көтерген кибершабуылдардың артында тұр деп айыптады. Бұл туралы Франция Сыртқы істер министрі Жан-Ноель Барро баспасөз мәслихатында мәлімдеді, деп хабарлайды infohub.kz сайты.
Министрдің айтуынша, шабуылды Иранның Ислам революциясының сақшылар корпусы жасаған. Ол шабуылды «ауқымы жағынан да, агрессия деңгейі жағынан да бұрын-соңды болмаған» деп сипаттап, ел «осы шабуылға жауаптылардың барлығына қарсы Еуропа деңгейінде санкциялар енгізетінін» қосты.
Өткен айда болған кибершабуыл кезінде Францияның жүздеген супермаркетіндегі тоңазытқыштар мен мұздатқыштар қызып кетіп, балғын және мұздатылған азық-түлік бүлінді. Шығын миллиондаған еуроға бағаланады. Ал өткен аптада тағы жеті еуропалық елдегі ондаған супермаркет те тоңазытқыштар мен мұздатқыштарға бағытталған кибершабуылдан зардап шекті. Бұл оқиғалардың өзара байланысы әзірге белгісіз.
Иран Барроның айыптауларына әлі жауап берген жоқ.
Сонымен бірге дүйсенбіде Париж прокуроры Иранның Ислам революциясының сақшылар корпусымен байланысты шабуылдық кибербөлімше басшысына және оның екі орынбасарына қатысты тергеу басталғанын мәлімдеді. Лор Бекко бұл бөлімшені «Шахид Каве» деп атап, оның Ислам революциясының сақшылар корпусының электрондық және киберорталығымен байланысы бар екенін айтты.
11 қазанда хакерлер Францияның көптеген супермаркетінде қолданылатын тоңазытқыш қондырғылардың температурасын реттейтін бағдарламалық жасақтаманы бақылауға алған. Coopérative U желісінің 100-ден астам супермаркеті, сондай-ақ Intermarché және оның Netto брендінің 180 дүкені зардап шекті. Кейбір дүкендерде тоңазытқыштардың температурасы түнде 50 градусқа дейін көтерілгені хабарланды.