Испанияда тұрғын үй дағдарысының символына айналған мүгедек зейнеткер Марикармен Абаскаль Мадридтегі үйіне қайта орала алады. Бұл туралы оның адвокаты Бeaтрис Дуро мәлімдеді, деп хабарлайды infohub.kz сайты.

87 жастағы әйел 23 қыркүйекте 70 жылдан астам тұрған пәтерінен зорлықпен шығарылып, носилкамен алып кетілген еді. Оқиғадан кейін ол ауруханаға жатқызылды.

Бұл әрекет бүкіл Испанияда наразылық тудырды. Премьер-министр Педро Санчес сейсенбідегі үкімет отырысында тұрғын үй мәселесі бойынша жеңілдік шараларын ұсынатынын уәде етті.

Абаскальдың адвокаты Бeaтрис Дуро баспасөз мәслихатында «екі тарап та ізгі ниет танытқанын» айтып, жаңа келісімшарт бойынша ол бұрынғыға жуық жалдау ақысын төлейтінін, бұл бағаның күрт өсуін болдырмайтынын жеткізді.

Абаскальдың әкесі 1956 жылы пәтерді жалға алған, ата-анасы қайтыс болған соң ол жалға алушы ретінде қалған. Сол кезде жалдау ақысына шектеу қойылған болатын.

2018 жылы үйді сатып алған Urbagestión инвестициялық компаниясы жалдау ақысын айына 500 еуродан (428 фунт; 572 доллар) 2 650 еуроға (2 280 фунт; 3 020 доллар) көтерді. Кейін компания оны 1 650 еуроға төмендетуді ұсынды, бірақ ол айлық зейнетақысы 1 350 еуро болғандықтан бұл соманы да төлей алмады.

Оны шығаруға бұған дейін үш рет сот тыйым салған.

Оның оқиғасы бүкіл елде наразылық тудырып, сенбіде ондаған мың адам Испания астанасында шеруге шығып, шығаруға қарсылық білдірді және тұрғын үй тапшылығы мен жалдау бағасының қымбаттауы жағдайында жалға алушыларды қорғауды күшейтуді талап етті.

Дуро әлі қол қойылмаған келісім «әлеуметтік жұмылдырудың нәтижесі» екенін айтты. Ол сондай-ақ шаршаудан емделіп жатқан Абаскаль өзін жақсы сезінгенде келісімге қол қоятынын қосты.

Қолдаушылар мұны жеңіс деп атады, бірақ осындай шығарулардың алдын алу және қолжетімді тұрғын үймен қамтамасыз ету үшін күресті жалғастыратынын уәде етті.

Испания Ұлттық банкінің бағалауынша, сұраныс пен жаңа құрылыс арасындағы алшақтыққа байланысты елде 700 мың тұрғын үй жетіспейді.

Парламентте көпшілігі жоқ Педро Санчестің Социалистік партиясы қоғамдық наразылықты басу үшін заң қабылдауды үміт етеді.