Израиль әскерінің Газа секторына жасаған шабуылдарынан кемінде 14 палестиналық қаза тапты, оның 8-і жерлеу рәсімі кезінде дрон соққысынан қаза болды, деп хабарлайды infohub.kz сайты.
Жұма күні Газаның орталық бөлігіндегі Нусейрат босқындар лагерінің Әл-Балата базар аймағында израильдік соққы бейбіт тұрғындардың жиынын нысанаға алды. Әл-Авда ауруханасының мәліметінше, салдарынан 8 адам қаза тауып, кемінде 20 адам жарақаттанды. Куәлардың айтуынша, дрон сол күні ертеректе осы ауданда болған бөлек шабуылда қаза тапқан палестиналықты жерлеу рәсімін күтіп тұрған адамдарды нысанаға алған.
«Бітімге ешқандай құрмет жоқ»,— деді Аль-Джазира тілшісі Хани Махмұд Газа қаласынан хабарлай отырып. Оның сөзінше, жерлеу шеруіне қатысушылар мешіттен шыққан кезде дрон соққысы топқа түскен.
Бөлек оқиғада, солтүстіктегі Бейт-Лахия қаласында 52 жастағы әйел қаза тапты — израильдік дрон Әбу Таммам мектебінің маңына бомба тастаған. Газаның орталығындағы Әз-Зауайда қалашығында палестиналықтардың жиынына жасалған шабуылдан тағы бір адам қаза тауып, бірнеше адам жараланды. Нусейраттың батысындағы Әл-Сауарха ауданында босқындар тұрған ғимаратқа ок тию салдарынан бір адам көз жұмды. Газа қаласындағы пәтерге дрон соққаннан бір адам өліп, бірнеше адам, оның ішінде балалар жарақаттанды. Хан-Юнистің оңтүстік-батысында тағы бір әйел израильдік октан алған жарақаттарынан қайтыс болды.
Өткен жылдың қазан айында күшіне енген атаулы «бітімге» қарамастан, Израиль Газаға тұрақты түрде шабуылдап келеді. Armed Conflict Location & Event Data (ACLED) зерттеу тобы сәрсенбіде израильдік шабуылдардың мамыр айынан бері артқанын хабарлады. Топтың мәліметінше, өткен айда 40-тан астам соққы тіркелген — бұл «бітім» басталғаннан бергі ең жоғары айлық көрсеткіш. Бұл өсім Израильдің Газадағы геноцидтік соғысының аяқталатынына күмән тудырып, қираған аумақты қалпына келтіру мен палестиналықтардың қалыпты өмірге оралу мүмкіндігіне қатысты сұрақтар туғызуда.
Израильдің Haaretz газеті жұма күні Израильдің балаларды «әдеттегідей» өлтіріп жатқанын хабарлады — «бітім» басталғаннан бері 274 бала қаза тапқан. Газеттің мәліметінше, орта есеппен күніне бір баладан мерт болған.