Батыс жағалауда израильдік қоныстанушылар екі мешітке, көліктерге және ауыл шаруашылығы жерлеріне өрт қойды, деп хабарлайды infohub.kz сайты. Бұл оқиға Тал ауылы маңында қоныстанушылар мен палестиналықтар арасындағы қақтығыстан екі күн өткен соң болды. Сол қақтығыстан төрт палестиналық пен екі израильдік қаза тапқан еді.
Екі жақ бір-бірін зорлық-зомбылықты тудырды деп айыптады. Қақтығыс Батыс жағалаудағы жағдайды одан әрі ушықтырып жіберді. Өңірде израильдік үкіметтегі оңшыл элементтердің қолдауымен экстремист-қоныстанушылардың палестиналықтарға қарсы зорлық-зомбылығы күн санап артып келеді.
Палестиналықтардың хабарлауынша, түнде екі ауылға қоныстанушылар шабуыл жасап, көліктерді зақымдап, мүліктерді ұрлап, қабырғаларға өшпенділік жазуларын сызған. Құсра ауылының әкімі Әбділ Әзім Уәдидің айтуынша, қоныстанушылар салынып жатқан мешітке өрт қойып, қабырғаларына «кегім» деген сөзді жазып кеткен. Израиль әскері Құсраға әскер жіберілгенін, полиция тергеу жүргізіп, дәлелдер жинайтынын мәлімдеген.
Палестиналық шенеуніктердің айтуынша, тағы бір оқиғада Күр ауылындағы мешітке қоныстанушылар өрт қойып, қабырғаларына ұрандар жазған. Жұма күні Талдағы қанды қақтығыстан бері Батыс жағалаудағы ауылдарға қоныстанушылардың шабуылы көбейген. Израиль әскімі демалыс күндері рейдтер жүргізіп, «терроризмге қарсы операция» аясында 130-дан астам адамды тұтқындаған.
Израильдің бас министрі Биньямин Нетаньяху Талдағы оқиғаға «күшті шаралар қолданатынын» мәлімдеген. Ол шамамен екі палестиналықтың үйін қирату мүмкіндігін де қарастырып жатқанын жеткізген.
Майамиден келген Қаид Ахмад Тураби ата-анасы мен әпкесіне қонаққа келген ауылда шабуылға ұшыраған. Ол көршісінің үйінде қоныстанушылармен ұрысқаны бейнеге түсіп қалған. «Мен бүкіл өмірімді еврейлермен бірге жұмыс істеп өткіздім, бірақ бұлардың беті жабық, қолдарында таяқтар мен әртүрлі заттар бар еді. Олар дайындалып келген», – дейді ол. Ауыл тұрғындары қоныстанушылардың жақын маңда қайта пайда болғанын байқап, жас жігіттер көшеге жиналып, ауылды қоршауға шыққан. Израиль әскері екі топты бөліп тұрса, палестиналықтарға көзден жас ашытқыш газ атқан.
Израиль әскери бөлімі жексенбі күні «ұлттық қылмыс оқиғаларының» алдын алу үшін жұмыс істеп жатқанын айтқан. Бірақ израильдік басшылар экстремистік зорлық-зомбылықты айыптағанымен, адам құқықтары жөніндегі ұйымдардың пайымдауынша, қоныстанушылардың палестиналықтарға шабуылын күшейтетін жаңа қоныстардың тез өсуіне жол беріп отыр. Нетаньяху Талдағы оқиғаға жауап ретінде Батыс жағалаудағы ферма қоныстарын заңдастыруды жеделдететінін мәлімдеген.
Біріккен Ұлттар Ұйымының дерегінше, Батыс жағалауда 1 114 палестиналық қаза тапқан, олардың көпшілігі Израиль әскерінің әрекетінен болған. Кем дегенде 35 адам қоныстанушылардың шабуылынан қаза тапқан. Ал палестиналықтардың шабуылынан немесе Израиль әскери операцияларынан 41 израильдік (азаматтар мен қауіпсіздік қызметкерлері) қаза тапқан. Израиль 1967 жылғы соғыстан бері Батыс жағалау мен Шығыс Иерусалимде 700 мың еврей орналасқан жүздеген қоныс салған. Бұл жерлерді палестиналықтар болашақ мемлекетінің бөлігі деп санайды. Қоныстар халықаралық құқық бойынша заңсыз болып табылады.