Испаниядағы Толедо провинциясының Урда маңында болған пойыздар соқтығысуы кемінде 69 адамның өмірін қиды. Сол қайғылы оқиқада Кембридж университетінің ғалымы, доктор Марта Шахбази де қаза тапты, деп хабарлайды infohub.kz сайты.
Марта Шахбази Кембридж бағаналы жасушалар институтының қауымдастырылған доценті әрі сол қаладағы Медициналық зерттеулер кеңесінің молекулалық биология зертханасының (LMB) топ жетекшісі болған. Ол апатқа ұшыраған пойыздардың бірінде келе жатқан.
Зертхананың мәліметінше, екі баланың анасы болған ғалым жақында Испания даму биологиясы қоғамының ғылыми үздіксіздік сыйлығын жеңіп алған. Оған марапат Андалусиядағы Эль Ромпидо қаласында өтетін қоғам конференциясында табысталуы тиіс еді.
LMB өзінің LinkedIn парақшасында оның қазасына қатты қайғырып отырғанын жеткізді. Зертхана бұл жоғалтуды «терең соққы әрі зор шығын» деп атап, былай деп жазды: «Марта — шабыттандыратын, талантты және құштар ғалым еді. Оның зерттеулері адам эмбрионының дамуының ең алғашқы кезеңдеріне және жүктіліктің үзілуіне әкелетін қателіктердің қалай пайда болатынына жарық түсірді».
Зертхана оны отбасы мен мансапты ұштастыру туралы әсерлі жазған, өзін «ана-ғалым» деп сипаттаған үлгі тұтар тұлға ретінде атады.
Кембридж маңындағы Уэллком Сэнгер институтының топ жетекшісі, доктор Розер Венто-Тормо: «Марта Шахбази — керемет жан еді: жақын әріптес, қымбат дос және маған ғалым ретінде де, ана ретінде де шабыт берген адам», — деп жазды.
«Ғалым ретінде біз көптеген арманды бөлістік. Екі студентті бірге жетекшілік еттік, онымен қатар жұмыс істеу қаншалықты қуанышты болғанын сөзбен жеткізе алмаймын. Кейбір жұмысымыз алдағы айларда жарық көреді, оны оқыған әркім оның әр іске салған құштарлығын сезінеді …
Ойым оның отбасымен бірге. Мартаны таныған әркім олардың қаншалықты берік ұйымдасқанын және олардың ол үшін қаншалықты қымбат екенін көрді», — деп толықтырды ол.
Испанияның Сантьяго-де-Компостела қаласында орналасқан Молекулалық медицина және созылмалы ауруларды зерттеу орталығы (CiMUS) Шахбазиді «керемет жас зерттеуші» ретінде еске алды.
Бұл апат Испанияда биылғы екінші жоғары жылдамдықты теміржол апаты болды. Екі соқтығысу да ел астанасы Мадрид пен оңтүстіктегі Андалусия өңіріндегі Севилья қаласын қосатын желіде орын алған.
Бейсенбіден бастап үш күндік ұлттық аза тұту жарияланды. Испания премьер-министрі Педро Санчес оқиғаны «трагедия» деп атап, тергеу жүргізілетінін уәде етті.