Кипрде екі жасар ұлының қонақүйдің төртінші қабатынан құлап қаза табуына кінәлі деп танылған британдық азамат 3 мың еуро айыппұл төледі, деп хабарлайды infohub.kz сайты.
37 жастағы Джошуа Фостер Пафос аудандық сотының алдында жауап берді. Ол ұлын терезенің алдындағы тақтайшаға қойып, су паркін көрсетпек болған. Алайда терезенің ашық екенін байқамай қалып, баланы ұстап үлгере алмаған. Сот оны абайсыздықтан адам өліміне әкеп соққан әрекет үшін кінәлі деп таныды.
Фостер — аудитор. Сот үкімі оқылғанда ол көз жасына ерік бермеуге тырысты. 25 минутқа созылған тыңдаудан кейін ол адвокатымен және ата-анасымен құшақтасты.
Бала 12 шілдеде отбасы демалысының бірінші күні Хлоракас қаласындағы бес жұлдызды King Evelthon Beach Hotel and Resort қонақүйінің төртінші қабатынан құлаған. Сот отырысында Фостер, оның әйелі, екі баласы және қайын ата-енесі сол күні таңға жуық Кипрге келгені айтылды.
Отбасы бассейнге бару сияқты түрлі іс-шаралардан кейін кешкі асқа дайындалу үшін бөлмелеріне қайтқан. Сағат 18:00 шамасында Фостер, оның қайын атасы және ұлы лифтке қарай бет алған. Адвокат Александрос Александрудың сотқа айтуынша, сотталушы көңілді күйде болып, ұлымен ойнап жүрген.
Лифтке жақындағанда бала сырттағы су паркін байқап қалған. Фостер лифт түймесін басып, баланы терезе алдындағы тақтайшаға қойған. Бала сыртқа қараған кезде, Фостер есін жинап үлгермей жатып, «ақылға сыймайтын» оқиға орын алған.
6 қазанда өткен тыңдауда Александру Фостердің өмірі сол сәттен бастап «мүлдем өзгеріп кеткенін» айтты. Фостер терезенің сол бөлігінің ашық екенін білмегенін, қорғаныш шыны бар деп ойлағанын жеткізді.
Прокурор Хрисо Пергандидің айтуынша, сағат 18:40 шамасында полицияға жағажай маңындағы қонақүйдің төртінші қабатынан баланың құлағаны туралы хабарлама келіп түскен.
Бала Пафос қалалық ауруханасына жеткізілген, бірақ дәрігерлердің жан сақтау әрекеттеріне қарамастан, ол қайтыс болды.
Полицияға берген ерікті түсініктемесінде Фостер ұлын терезе алдындағы тақтайшаға қойғанда, баланы «ұстап үлгермей жатып құлап кеткенін» айтқан.
Оқиғадан кейін Фостер Пафос қалалық ауруханасына жеткізіліп, есірткі мен алкогольді анықтау үшін қан үлгісі алынған. Талдау қанындағы алкоголь концентрациясы шамамен 124 мг болғанын көрсетті.
Алайда алкогольді тұтыну Фостерге қарсы істің маңызды бөлігі болған жоқ. Оның адвокаты сотталушының мас болғаны туралы ешқандай куәлік жоқ екенін мәлімдеді.
Адвокат Фостердің бұрын сотты болмағанын және өкінішінің «айқын» екенін сотқа жеткізді. Ол оқиғадан кейін сегіз күн қамауда ұсталғанын, баласының қазасына қайғырып жүріп, қамаудан қызына қоңырау шалып, не болғанын түсіндіруге мәжбүр болғанын айтты.
Сот терезенің ені 2,85 метр, биіктігі 1,2 метр екенін анықтады.