Америка Құрама Штаттарының Калифорния штатында 34 жастағы ер адам кинотеатрда фильм көріп отырған кезде ұялы телефонын қолданған көрерменге бұрыш бүркіп жіберген деген айыппен ұсталды, деп хабарлайды infohub.kz сайты.
Бурбанк қалалық полиция департаментінің мәліметінше, Мэтью Уэр 15 қыркүйекте AMC Burbank 16 кинотеатрында телефон қолданып отырған көрерменге бұрыш бүркіген деген күдікпен қамауға алынды. Бұрыш бүркілген кезде жақын жерде отырған тағы екі көрермен де тітіркену белгілерін сезінген. Үш адам да жергілікті ауруханада медициналық көмек алды.
Уэрге ұсақ бұзақылық бабы бойынша айып тағылды және Бурбанк қамау орнына қамалды.
NBC News телеарнасына сөйлеген куәгердің айтуынша, оқиға фильм басталғаннан кейін 40 минут өткенде болған.
«Барлығы қалыпты жүріп жатқан, кенет артымнан аэрозоль құтысының дыбысын естідім, бүріккіш сияқты. Сосын бір жігіт: „Маған бұрыш бүркіп жіберді. Мына адам маған бұрыш бүркіді“, — деп айқайлады», — деді Джо Родригес аталған ақпарат құралына.
Тағы бір көрермен Уэрдің көршісіне бұрыш бүркіген соң дереу кинотеатрдан жүгіріп шыққанын көргенін айтты. Үш адам оны қуып, кинотеатрдың басқа бөлігінен тапқан.
Родригестің NBC News-ке айтуынша, бұл қақтығыс өзін-өзі қорғауға ұқсамаған.
«Ең көзге түскені — ол телефонда отырған жігіттің өзіне „ақыл айтқанын“ айтты. Бұл жай ғана кинотеатрда біреудің дөрекілігіне шыдамай, ашуға берілген адам еді», — деді Родригес.