Мичиган штатының Мисоки округінде болған атыс оқиғасы бес адамның өмірін қиды. Қарулы шабуыл жасап, ізін суытқан күдіктінің мәйіті кейін орманды алқаптан оның құрбандарының бірімен бірге табылды. Бұл туралы infohub.kz сайты хабарлайды.
Полицияның мәліметінше, 13 жастағы қыз аман қалып, оның жағдайы тұрақты. Қаза тапқандардың арасында 16 жастағы ұл, 45 жастағы ер адам, 40 жастағы әйел, 53 жастағы ер адам және 29 жастағы әйел бар. Алғашқы шабуыл Детройттан солтүстік-батысқа қарай шамамен 270 шақырым жердегі үйде болған. Құқық қорғау органдарының хабарлауынша, күдікті Чад Хикман (39 жаста) сол жерден қашып, екінші үйде тағы бір адамды өлтірген, содан кейін орманда тағы бір әйелді атып өлтірген.
Мичиган штатының полициясы құрбандардың туыстық қатынасын немесе күдіктімен байланысын нақтыламаған. Барлық қаза тапқандар оқ жарақатынан мерт болған. Полиция лейтенанты Эшли Миллер бұл оқиғаны «жүректі ауыртатын жағдай» деп сипаттап, тергеу жалғасып жатқанын жеткізді.
Чад Хикманның 2024 жылы балаға қатысты құқық бұзушылық үшін сотталғаны белгілі болды. Ол бір жылға бас бостандығынан айырылған. Сол істе оған тағылған ауыр қылмыс және жыныстық сипаттағы айыптар алынып тасталған еді.
Мичиган губернаторы Гретхен Уитмер бұл оқиғаға байланысты көңіл айтып, құрбандардың отбасыларына және Мисоки қауымдастығына қолдау білдіретінін жазды. Тергеу әлі де жалғасуда.