Microsoft 365 қызметтерінің жаһандық іркілісі пайдаланушыларға электрондық пошта мен жасанды интеллект өнімдерін қоса, кейбір қызметтерді толығымен істен шығарды. Компания іркілістің киберқауіпсіздік оқиғасынан туындамағанын мәлімдегенімен, ақаулықты жою әрекеттері әзірге айтарлықтай нәтиже бермеді, деп хабарлайды infohub.kz сайты.
Teams, Outlook және Microsoft-тың Copilot атты жасанды интеллект бағдарламасы сияқты Microsoft 365 қызметтері «байланыс мәселелеріне» тап болды. Клиенттер әртүрлі деңгейдегі қолжетімділік туралы шағымдануда: көбісі хат жіберіп немесе қабылдай алмай, кейбір файлдарды не күнтізбе қолданбаларындағы мәліметтерді көре алмай отыр. Бірқатар пайдаланушы Teams-ті пайдаланып, хабарлама жіберу мен онлайн кездесу функцияларын қиындықсыз қолданып жүр.
Microsoft-тың сайтындағы деректерге сәйкес, Microsoft 365 қолданбаларын 430 миллионнан астам адам пайдаланады. Іркілістің толық ауқымы әзірге расталмаған, алайда мониторингтік Downdetector сайтына бейсенбі кешке 74 елден 140 мың адам Outlook-тағы ақаулық туралы хабарлаған. Нақты зардап шеккендер саны әлдеқайда көп болуы мүмкін, өйткені Downdetector негізінен пайдаланушылардың өздері хабарлаған деректерге сүйенеді. Microsoft 365-ті әлемнің түкпір-түкпіріндегі компаниялар да қолданады, сондықтан іркілістің басқа қызметтерге де кері әсер етуі күтілуде.
Технологиялық алыптар OpenAI мен Anthropic те іркіліс салдарынан мәселеге тап болғанын хабарлады. ChatGPT-ді жасаушы OpenAI Microsoft қызметтерімен байланысына әсер еткен ақаулықты тексеріп жатқанын, оның кейбір құралдардың күтілгендей жұмыс істемеуіне әкелгенін айтты. Сингапур үкіметі мен Аустралияның барлау агенттігін қоса, мемлекеттік органдар мен қызметтер де зардап шеккенін мәлімдеді. Бүкіл Ұлыбританияда жалпы тәжірибе дәрігерлерінің қабылдау бөлімдері, дәріханалар, полиция мен мектептер іркілістен зардап шекті. Кейбір емханалар мәселе шешілгенше пациенттерді сайт арқылы хабарлама жібермеуге шақырса, бірнеше ірі полиция бөлімшесі тұрғындарды арыз-шағым үшін қоңырау шалуға үндеді.
Microsoft кибершабуылды жоққа шығарып, жалғасып жатқан іркілісті инфрақұрылымындағы «жоғары жүктемеге» байланыстырды. Бұл термин серверлер әдеттегіден әлдеқайда көп күйзеліске түскен жағдайды білдіреді. Microsoft-тың айтуынша, іркіліс кезінде серверлердің көп бөлігі «күтпеген жерден қолжетімсіз» болып, қалған серверлерге қосымша трафик түсіп, оларды қиындатқан. Жұма күні таңертең Microsoft «тұрақтанудың алғашқы белгілері» байқалғанын, бірақ қызмет қуаты «әлі қалыпты деңгейге оралмағанын» мәлімдеді. Бұған дейінгі мәлімдемесінде технологиялық алып түзету әрекеттерінің «күтілгендей нәтиже бермей жатқанын» айтқан.
Аустралиялық киберқауіпсіздік сарапшысы Трой Хант BBC-ге іркілістің алысқа таралатын салдары болуы мүмкін екенін айтты. «Microsoft — интернет омыртқасының үлкен бөлігі және бұл бізге электрондық поштаның әлі де қаншалықты маңызды екенін еске салады. Бұл іркіліс көп адамның жұмыс істеу қабілетіне ғана емес, сондай-ақ кездесулер туралы келісу, растауды қажет ететін заттарды сатып алу, аккаунттар мен қызметтерді құру немесе оларға кіру сияқты істерге де әсер етеді», — деді ол. Жаңа Зеландиядағы Gorilla Technology консалтингтік фирмасының өкілі Пол Спейн электрондық пошта мен қызметтер желіден шығып қалғандықтан, компаниялар іс жүзінде «бір жұмыс күнінен айырылғанын», бұл пайдаланушыларды «әбден қалжыратқанын» атап өтті.