Нидерланд орталық банкі (DNB) АҚШ пен Канадада сақталған 86 тонна алтын қорын Лондонға аударғанын хабарлады. Бұл шешім «геосаяси тұрақсыздықтың артуына» байланысты қабылданған, деп хабарлайды infohub.kz сайты.
Банк мәліметінше, Лондонда сақталған алтынды Нью-Йорк пен Оттавадағыға қарағанда оңай сатуға болады. «Бұл дағдарыс жағдайында банкке алтынды тез пайдалануға мүмкіндік береді», — делінген сәрсенбідегі мәлімдемеде.
DNB президенті Олаф Слейпеннің айтуынша, бұл қадам алтын қорын пайдалану мүмкіндігін жақсартты. «Біз алтынды ешқашан пайдалануға тура келмейді деп үміттенеміз, алайда төзімділік пен дайындықты арттыру қажет», — деді ол.
2025 жылдың соңында Нидерландтың жалпы алтын қоры 612,4 тоннаны құрап, құны 72,2 млрд еуроға (83,7 млрд доллар) бағаланған. Аударуға дейін банк алтынының 31,3 пайызы Нью-Йоркте, 19,7 пайызы Оттавада сақталған еді. Аударымнан кейін бұл елдердің әрқайсысында Нидерланд алтын қорының 18,5 пайызы қалды.
Лондондағы алтын үлесі 18,1 пайыздан 32,1 пайызға өсті. Банк әлі де өз алтынының 30,8 пайызын Нидерландта сақтайды.
Аударым ішінара сатып алу-сату арқылы, ішінара физикалық тасымалдау арқылы жүзеге асырылған. Банк АҚШ пен Канададан Зейстке 27 тоннадан астам физикалық алтын жеткізген. Сол мөлшердегі алтын Зейсттен Лондонға аударылып, алтын құймаларын балқытудың қажеті болмаған.
«Сатып алу-сату мен физикалық тасымалдауды біріктіру арқылы үлкен көлемдегі алтынды тасымалдауға байланысты тәуекелдерді бөлуге мүмкіндік туды», — деп түсіндірді банк. Операция биылғы жылдың наурыз-тамыз айлары аралығында жүргізілген.
Париждегі Ұлттық алтын саудасы ұйымының президенті Лоран Шварцтың пікірінше, орталық банктер шамамен он жыл бойы резервтерін ауыстырып келеді. «АҚШ-тағы қазіргі саяси жағдай кейбір орталық банктерді басқа сақтау орындарын таңдауға итермелеуі мүмкін», — деді ол. Шварц Лондон нарығы ең терең және өтімді екенін, сондықтан дағдарыс кезінде алтынды пайдалану оңай екенін атап өтті.
Cite Gestion Private Bank аналитигі Джон Плассард Нидерландтың бұл қадамы «дағдарыс жағдайында алтынның қолжетімділігін арттыруға» бағытталғанын айтты. Ол әзірге бұл «бір реттік әрекет» деп есептейді, бірақ басқа орталық банктер де осылай істесе, бұл АҚШ-қа деген сенімге нұқсан келтіруі мүмкін деп ескертті.
Жыл басында Германияда өз орталық банкінің Нью-Йорктегі резервтерінің қауіпсіздігіне қатысты алаңдаушылық туындаған болатын. Алайда ықпалды Бундесбанк әзірге резервтерін Нью-Йорктен ауыстырмау туралы шешім қабылдады. «Нью-Йорк федералды резерві біздің алтынды сақтайтын маңызды орын болып қала береді», — деп мәлімдеді банк қаңтар айында ARD телеарнасына.