Ұлыбританиядағы Оксфорд қаласында орналасқан Питт Риверс мұражайы нага халқының ата-бабаларына тиесілі 39 бас сүйегін Үндістанға қайтарды. Бұл туралы infohub.kz сайты хабарлайды.
Питт Риверс мұражайы нага мәдениетіне қатысты 6 мыңнан астам жәдігер сақтайды. Бұл жинақ әлемдегі ең үлкені саналады. Олардың басым бөлігі Үндістан мен Мьянмада (бұрынғы Бирма) британ отаршылдығы кезеңінде жиналған.
Мұражай сайтында 219 зат адамның сүйек қалдықтары ретінде тіркелген. Олар 1910–1940 жылдары аралығында жинаққа қосылған. Негізінен оларды антрополог болған екі отаршыл әкімші жинаған.
Мұражай сайтында сол кезеңде жиналған заттардың «жазалау әскери жорықтары кезінде жиі тәркіленгенін, ерікті түрде берілмегенін» атап көрсетілген.
Оксфордқа сапары барысында нага делегациясы қалдықтарды жинауға қатысқан антропологтардың бірінің ұрпақтарымен де кездесті.
«Бұл адам сүйектерінің біздің жерімізден алып кетілу тәсілі көп ой салады», — деді тайпа көшбасшыларының бірі Теджао Вихьенуо AFP агенттігіне.
«Әкесінің немесе атасының бас сүйегін ешкім басқа адамға сыйға тартпас еді деп ойлаймын», — деп қосты ол.
Антропологтардың айтуынша, нага халқы бұрын бас аулау дәстүрін ұстанған, яғни жауларының басын олжа ретінде кесіп алған. Сонымен қатар өз көсемдерінің бастарын ауыл орталығында сақтаған.
XIX ғасырда құрылған Питт Риверс мұражайы бұған дейін Австралия, Жаңа Зеландия және АҚШ-тағы байырғы қауымдастықтарға адам сүйектерін қайтарған.
Үндістанға жасалған соңғы тапсыру тек 39 ата-баба қалдығына қатысты. Ол 2025 жылы нага делегациясының Оксфордқа барып, оларды қайтаруды ресми түрде сұрағанынан кейін жүзеге асты.
Мұражай қыркүйек айында қалдықтардың Үндістанға қайтарылатынын жариялаған болатын.