Оңтүстік Калифорнияны бұрын-соңды болмаған аптап ыстық қаптады. Күз мезгіліне қарамастан ауа температурасы қалыпты деңгейден 15–20 градусқа жоғары көтерілді, деп хабарлайды infohub.kz сайты.
Дүйсенбі бірқатар қала үшін ерекше қапырық күн болды. Лос-Анджелестің орталығында 40 градус (104F) тіркеліп, 1953 жылы 5 қазанда белгіленген 38,3 градус (101F) рекорды жаңартылды. Бұл деректі Ұлттық ауа райы қызметі хабарлады.
Лос-Анджелестен шамамен 30 миль оңтүстікте орналасқан Санта-Ана тұрғындары да 41,1 градус (106F) ыстықты бастан кешті. Бұған дейінгі күндік ең жоғары көрсеткіш 1953 жылы тіркелген 39,4 градус (103F) еді, деп мәлімдеді сол ведомство.
Санта-Барбарадан Сан-Диегога дейінгі жағалау бойында бейсенбіге дейін қатты ыстық туралы ескерту жарияланды. Денсаулық сақтау органдары аймақтағы миллиондаған тұрғынға ашық ауадағы белсенділікті шектеп, суды жиі ішуді ұсынып отыр.
Ұлттық ауа райы қызметі бұл қапырықты жоғары қысым жотасымен байланыстырады: ыстық ауа белгілі бір аймақ үстінде қамалып қалады.
Сан-Диего мен Лос-Анджелесте түнгі температура 21–24 градус аралығында сақталады деп болжануда. Ведомствоның атап өтуінше, бұл жағдай тұрғындарға жеңілдік әкелмейді.
Тек температура ғана емес, аптап ыстықтың ұзақтығы да рекорд орнатты. Өткен аптада Лос-Анджелесте төрт күн қатарынан ауа температурасы 37,8 градустан (100F) жоғары болды. Бұл қазандағы үш таңбалы көрсеткіштің ең ұзақ легі саналады.
Ұлттық ауа райы қызметінің мәліметінше, Калифорнияның жағалау аймақтары бейсенбіден бастап салқындай бастайды, келесі аптада жаңбыр жауады деп күтілуде. Штаттың ішкі аудандарында да жұма мен сенбіде температура төмендеуі мүмкін.