Оңтүстік Корея соты ойын индустриясының магнаты Квон Хёк Бинді бұрынғы әйеліне 2,55 триллион вон (1,87 млрд доллар) көлеміндегі активтерді төлеуге міндеттеді. Бұл ел тарихындағы ең ірі ажырасу төлемі болып отыр. Бұл туралы infohub.kz сайты хабарлайды.
Квон Хёк Бин — Оңтүстік Кореяның үшінші ірі бейнеойын компаниясы Smilegate-тің негізін қалаушы. Bloomberg деректері бойынша, оның таза байлығы 3 млрд долларды құрайды. Сот шешіміне дейін компания толығымен оған тиесілі еді. Алайда сот оның 35% үлесін, яғни шамамен 2,5 триллион вонға бағаланатын акцияларды бұрынғы әйелі Ли Хва Джинге беруді ұйғарды. Сонымен қатар, ол оған қосымша 65 млрд вон қолма-қол ақша төлеуі тиіс.
Бұл төлем алдыңғы рекордтан екі еседен астам жоғары. Бұған дейін технологиялық алпауыт SK Group төрағасы Чхве Тэ Вон бұрынғы әйеліне 944 млрд вон төлеуге міндеттелген еді.
Квонмен ажырасу туралы арыз берген Ли Хва Джин Smilegate-тің 50% үлесін талап еткен. Оның адвокаттары компания құрылған кезде оның қаржыландыруға көмектескенін алға тартты. Бұл туралы Bloomberg хабарлайды. Квон мен Ли 2001 жылы үйленген, ал Квон Smilegate-ті бір жылдан кейін құрған. Компанияның ең танымал ойындары — бірінші адам көзқарасындағы шутер CrossFire және рөлдік ойын Lost Ark.
Ли Хва Джин өзінің 20 жылдан астам уақытын балаларды тәрбиелеуге және үй шаруасына арнағанын айтқан. Ал Квон болса, Ли компанияға инвестиция салмағанын және онда жұмыс істемегенін алға тартқан. Осы жылдың басында Smilegate компанияның барлық бастапқы капиталы Квоннан келгенін мәлімдеген болатын.
Smilegate өкілі «ірі акционердің жеке істеріне түсініктеме беруден бас тартты». The Chosun Daily газетіне сілтеме жасаған мәлімдемеде олар: «Біз әдеттегідей өз міндеттерімізді адал атқара береміз», — деген.
Екі тарап та сот шешіміне шағымдана алады. Осы жылдың шілде айында SK Group төрағасы Чхве Тэ Вон бұрынғы әйеліне 944 млрд вон төлеуге міндеттелген еді. Бұл бүгінгі шешімге дейін Корея тарихындағы ең ірі ажырасу төлемі болатын. Алайда кейін Жоғарғы сот жұбайлар активтерінің құнын асыра бағалаған есептеу қателігін атап, бұл шешімді жойды. Іс қайта қарауға жіберілді.