Панама үкіметі сенбі күні төтенше жағдай жариялады. Себебі елді дүр сілкіндірген екі қуатты жер сілкінісінің кейінгі дүмпулері бірнеше сағат бойы жалғасып, тұрғындарды әбігерге салды. Жұма күні болған магнитудасы 7,7 және 6,6 жер сілкінісінен адам шығыны тіркелмегенімен, Панаманың барлық 10 провинциясы мен екі байырғы аумағында зақым келгені хабарланды, деп жазады infohub.kz сайты.
Жер сілкінісі эпицентр маңындағы ғимараттарды қиратып, бүкіл Орталық Америка елінде эвакуация жүргізуге мәжбүр етті. Сейсмологтар магнитудасы 5,8, 5,5 және 5,2 болатын дүмпулерді қоса алғанда, 100-ден астам кейінгі дүмпуді тіркеді.
Америка Құрама Штаттарының Геологиялық қызметінің мәліметінше, алғашқы жер сілкінісі Эррера орталық провинциясындағы шалғай Питалоса-Арриба елді мекенінен оңтүстік-батысқа қарай шамамен 10 шақырым жерде болған. Оның ошағы 10 шақырым тереңдікте жатты. Дүмпу көршілес Колумбияда да сезілді.
Президенттік министр Хуан Карлос Ориллак астана Панама-Ситиде өткен баспасөз мәслихатында төтенше жағдай туралы жариялады. Оның айтуынша, тұрғын үйлер, мектептер, денсаулық сақтау нысандары, жолдар мен қонақүйлер зақымданған.
Ұлттық азаматтық қорғаныс жүйесінің директорының орынбасары Малици Ривера 27 адамның түрлі дәрежедегі жарақат алғанын мәлімдеді.
Негізгі зақым Вергауас, Эррера, Кокле және Лос-Сантос орталық провинцияларында шоғырланған. Азаматтық қорғаныс агенттігінің дерегінше, шамамен 420 тұрғын үй мен сонша мемлекеттік мектеп зақымданған. Сондай-ақ жеті қонақүй, кемінде 13 шіркеу және тоғыз көпір зардап шеккен.
Эпицентрден солтүстік-шығысқа қарай шамамен 64 шақырым жердегі отаршылдық дәуірден қалған Ла-Вилья-де-Лос-Сантос елді мекенінде үйлер мен тарихи католик шіркеуі қирады. Түні бойы көшеде қалған адамдар үкіметтің әрі қарай не істеу керектігі туралы нұсқауын күтіп отыр.
Үйі ішінара қираған Тони Хименес туыстарымен бірге шатыр астында отырып: «Біз кеше түстен кейін сағат бірден бері осындамыз, орнымыздан қозғалған жоқпыз. Бұл қорқынышты жағдай болды. 90 жасымда мұндайды бастан кешірмегенімді анық айта аламын. Қатты болды – шынымен қатты», – деді.
Сенбі күні шенеуніктер хабар-ошарсыз кеткендер туралы мәлімдеген жоқ, бірақ кейбір елді мекендерге көшкін мен жолдың бүлінуіне байланысты қатынас жоқ екенін айтты.
Мексика Ұлттық автономиялық университетінің сейсмология бөлімінің жетекшісі Карлос Вальдестің пікірінше, елдің жаппай қаза табудан аман қалуы қатаң құрылыс нормаларымен, әсіресе астанадағы тік мұнаралардың құрылысына қатысты ережелермен байланысты болуы мүмкін.
Жер сілкінісінен кейін бүкіл аймақтан қолдау мен көмек ұсыныстары жіберілді. Мулино жұма күні Латын Америкасы көшбасшыларына қолдауы үшін алғыс айтып, Чили, Уругвай және Гватемала президенттерімен сөйлескенін мәлімдеді.
АҚШ Мемлекеттік департаменті сенбі күні жергілікті билікке іздеу-құтқару тәжірибесімен, сондай-ақ әуеден және жердегі бағалауға көмектесу үшін апатқа ден қою тобын жұмылдырғанын хабарлады. АҚШ үкіметі гуманитарлық көмекке 5 миллион доллар бөлетінін уәде етті.
АҚШ әскери күштерінің оңтүстік қолбасшылығы Мемлекеттік департаменттің есірткіге қарсы күрес бюросының қолдауымен екі тікұшақ жер сілкінісінен зардап шеккендерге 2000 фунт (907 келі) азық-түлік жеткізгенін мәлімдеді.