Париж полициясы он орта мектеп пен бес университеттің маңында наразылық акцияларын өткізуге бес күндік тыйым салды. Бұл шешім Франциядағы білім орындарында бірнеше аптадан бері жалғасып келе жатқан блокадалар мен тәртіпсіздіктерді бақылауға бағытталған, деп хабарлайды infohub.kz сайты.
Бұйрық бойынша 16-20 қараша аралығында аталған нысандардан 100 метр радиуста рұқсат етілмеген жиындар мен шерулер өткізуге жол берілмейді. Париж полициясының басшысы Патрис Фор тыйымның «кейбір орта мектептер мен жоғары оқу орындарының айналасындағы көптеген кедергілер мен блокадаларға» және «үздіксіз зорлық-зомбылыққа» байланысты қажеттігін мәлімдеді.
Францияда наразылық толқыны қыркүйек айында орта мектептердегі нашар жағдайға байланысты басталып, кейін университеттерге, жұмысшыларға және өмір сүру құнына қарсы «сары жилеттер» қозғалысына тарады. Полиция басшысы бұйрықты жариялай отырып, кейбір орта мектептер мен университеттердің айналасындағы блокадалар мемлекеттік мүліктің бүлінуіне, білім қауымдастығы өкілдеріне жасалған зорлық-зомбылыққа және құқық қорғау органдарымен қақтығыстарға әкелгенін атап өтті.
Жергілікті бұқаралық ақпарат құралдарының хабарлауынша, Париждің сегіз ауданының әкімдері блокадаға ұшыраған орта мектептердің «кіреберістері мен шығаберістерін қорғауды» қамтамасыз ету шараларын қабылдау үшін өңірлік білім басқармасына жүгінген. Патрис Фордың жексенбідегі мәлімдеуінше, наразылықтар басталғаннан бері Парижде 1 548 адам ұсталған.