Оңтүстік Кореяның жерсерігі SpaceX зымыранының Айға соғылуынан пайда болған жаңа кратердің алғашқы суреттерін түсірді. Бұл туралы infohub.kz сайты хабарлайды.
Корея аэроғарыш зерттеу институтының Danuri аппараты сәрсенбіде Falcon 9 зымыранының жоғарғы сатысы Айға кездейсоқ соғылған соң, соққы орнының үстінен бірнеше рет ұшып өтіп, суреттерге түсірді. Космостық агенттік бейсенбіде жариялаған суреттерде зымыран соққан жердің айналасы қарауытып, кратер пайда болғаны және шаң-топырақтың шашырағаны көрінеді.
Кореялық ғарыш мамандары Danuri соққыға дейінгі және кейінгі суреттерді жинағанын хабарлады. NASA-ның Lunar Reconnaissance Orbiter аппараты келесі аптада соққы орнының үстінен ұшып өтіп, жағдайды бақылайды деп күтілуде.
Илон Масктың SpaceX компаниясы Danuri-ді 2022 жылы Канаверал мүйісінен ұшырған болатын. Сол жылы компания Айға екі жеке меншік қону аппаратын да жіберді. Осы аптада Айға соғылған зымыранның жоғарғы сатысы дәл сол ұшыру кезіндегі болды. Ол сағатына 8700 шақырым жылдамдықпен Айға соғылды. SpaceX-тің мәліметінше, аппарат күн белсенділігі мен гравитацияның әсерінен кездейсоқ соқтығысу траекториясына түскен.