Австралиялық жазушы Тим Уинтонның отбасылық эпопея жанрындағы «Cloudstreet» романы ABC Radio National радиосы өткізген жалпыұлттық сауалнамада елдің ең сүйікті кітабы деп танылды, деп хабарлайды infohub.kz сайты.

Радиохабар таратушы демалыс күндері оқырмандардың үздік 100 австралиялық кітабының тізімін анықтауға арналған сауалнама қорытындысын жариялады. Екінші орынды Маркус Зусактың 2005 жылы жарық көрген «The Book Thief» романы иеленсе, үшінші сатыда Трент Далтонның «Boy Swallows Universe» шығармасы тұр.

Алғаш рет 1991 жылы басылым көрген «Cloudstreet» екі жұмысшы тап өкілі — Лэмбтар мен Пиклстар отбасыларының соғыстан кейінгі Пертте «Cloudstreet» деп аталатын ескі, кең үйде жиырма жыл бойы бірге тұрған өмірін баяндайды. Уинтонның бесінші романы әрі тоғызыншы кітабы саналатын туынды жарық көрген бойда көптеген марапатқа ие болды, оның ішінде 1992 жылы Майлз Франклин сыйлығы берілді. Ондаған жылдан бері шығарма австралиялық ағылшын әдебиеті сабақтарының негізгі оқулығына айналды. Тек Австралияның өзінде кітаптың жүздеген мың данасы сатылды.

«Cloudstreet» бұған дейінгі сауалнамаларда да көш бастаған. Атап айтқанда, 2003 жылы Австралиялық авторлар қоғамы жазушылар арасында сүйікті кітаптарды анықтау үшін сауалнама жүргізсе, сол жылы ABC телеарнасы халық арасында ұқсас сауалнама өткізген болатын. Сондай-ақ Уинтонның романы 2019 жылы BBC жариялаған «Әлемді қалыптастырған 100 роман» тізіміне енген.

Биылғы ABC Radio National сауалнамасының қорытынды тізіміне ересектерге арналған көркем және деректі әдебиет, жасөспірімдерге арналған көркем әдебиет, балаларға арналған суретті кітаптар, тарихи еңбектер мен аспаздық кітаптар кірді. «The Australian Women’s Weekly Children’s Birthday Cake Book» үздік 50-дің ішінен орын алса (22-орын), Стефани Александердің «The Cook’s Companion» кітабы 56-орынға тұрақтады. Наги Маэхашидің «RecipeTin Eats: Dinner» кітабы 96-орыннан көрінді.

Жазушылар Хелен Гарнер, Мелисса Лукашенко, Джеральдин Брукс, Анна Фандер, Питер Кэри мен Ханна Кенттің бірнеше кітабы жексенбіде жарияланған үздік 100 тізіміне енді. Балалар жазушылары Элисон Лестер, Пол Дженнингс, Мем Фокс, Джинни Бейкер мен Рут Парктың шығармалары да қорытынды жүздікке кірді.

Тізімдегі ең ерте жарық көрген туынды — Маркус Кларктың 1874 жылы басылған «For the Term of His Natural Life» кітабы (80-орын). Ал ең жаңа шығармалар ретінде Салли Хепворттың «Mad Mabel» және Шарлотта Макконагидің «Wild Dark Shore» кітаптары тіркелді, екеуі де 2025 жылы жарық көрген.

ABC Radio National радиосының «The Bookshelf» әдеби бағдарламасының жүргізушісі Кейт Эванс тізімге «батыл көркем әдебиеттен бастап біздің кім болғанымызды және сол күрделі өткенді қалай түсінуге болатынын баяндайтын тарихи әңгімелерге, қуанышқа толы балалар кітаптарына, азап пен әзілді қатар жеткізетін байырғы халық әңгімелеріне, сондай-ақ сансыз отбасылық хикаяларға» дейінгі туындылар енгенін атап өтті.

«Бұл тізім біздің қалай оқитынымыз туралы үстірт тұжырымдарға қарсы келеді — міне, мәселенің мәні де осында», — деді Эванс.