Австрия астанасы Венаның Нойбау ауданында иттерді серуендетуге қатысты жаңа нұсқаулық енгізілді. Онда үй жануарларының зәрін бөтелкедегі ағын сумен шаю арқылы ағаштарды қорғау ұсынылады, деп хабарлайды infohub.kz сайты.
Кафелер мен галереяларға толы, тығыз қоныстанған әрі даму үстіндегі Нойбау ауданы осы аптада «Schönes Gassi» (жағымды серуен) науқанын бастады. Жоба аумақтағы 600 иттің жасыл желекке тигізетін әсерін реттеуге бағытталған. Соңғы онжылдықта климат дағдарысының салдарын азайту үшін осында шамамен 250 ағаш отырғызылған.
«Das Flascherl zum Sackerl» (қалтаға қоса бөтелке) ұранымен таратылған нұсқаулықта жануарлардың зәрі ағаш қабығын жеп, оның қорғаныш қабатын әлсірететіні, тіпті зиянды патогендер мен саңырауқұлақтардың діңге енуіне жол ашатыны айтылған.
«Аумақты белгілеу иттер үшін қарым-қатынас тәсілі болғанымен, қалалық ағаштарға күйзеліс әкеледі. Бұл шіріп кетуге, ең нашар жағдайда тұрақтылықтың бұзылуына әкеп соғады», — деді квартал немесе аудан деген вена сленгінен атау алған «Grätzllabor» қоғамдық тобы.
Топ науқан Австрия астанасындағы «алаңдаушы азаматтармен» бірлесіп басталғанын мәлімдеді. Сондай-ақ ит иелерінен үй жануарларынан кейін тазалау үшін пластик қалта алып жүруді сұрайды.
Иелер қалалық әкімшіліктен иттері пайдаланған жерлерді шаю үшін тегін 270 миллилитрлік су бөтелкесін ала алады. Ерікті бастаманы басқа аудандарға да таратуға болады.
Жаңа зәр суда жақсы ериді, сұйылту аммиак пен топыраққа сіңетін басқа да зиянды заттардың концентрациясын айтарлықтай азайтып, иісті де әлсіретеді.
«Grätzllabor» шаю тәсілін иттерге ағаштарды немесе жасыл алаңдарды белгілеуге берілген «рұқсат» ретінде түсінуге болмайтынын, ол үй жануарларының зиянын азайту үшін иелері қолдана алатын шара екенін атап өтті.
Иттерді үйретуші Конни Шпоррер «Schönes Gassi» науқаны жануарлар қалдықтарына қатысты мәселелерді шешуге бағытталған неғұрлым қатаң талаптардың алдын алуға көмектесетінін айтты.
«Венада иттерге толы қала да, иттерге кез келген жерге зәр шығаруға рұқсат берілген қала да керек емес. Бізге ұқыптылық, тәрбие және иттерге арналған жеткілікті ыңғайлы орындар қажет», — деді ол журналистерге. Оның айтуынша, үй жануарларының көбін қай жерде дәрет сындыруға болатынын үйретуге болады.
Ұқсас бастамалар Жапонияда, Италияда, Швейцарияда және Еуропалық одақта ит ұстайтын үй шаруашылықтарының үлесі ең жоғары — 70 пайызды құрайтын Испанияда да енгізілген. Австрияда бұл көрсеткіш салыстырмалы түрде төмен — үй шаруашылықтарының 17 пайызы ғана.
Пандемия кезінде ит ұстаушылар саны артқаннан кейін 100 мыңнан астам ит бағылатын Берлин де бұл мәселені шеше бастады: кейбір аудандарда зәрге ерекше сезімтал ақ қараған ағашын отырғызуды тоқтатты. Көктемде батыстағы Шарлоттенбург-Вильмерсдорф ауданы иттер ағаштың орнына нысана ретінде пайдаланатын «зәр тастарын» орната бастаған.