Белгілі қазақстандық сериялық қанішер әрі адам жегіш Николай Жұмағалиевке ұқсас ер адамның мәлімдемесі желіде қызу талқылануда, деп хабарлайды Toppress.kz Ult.kz-ке сілтеме жасап.
Дереккөздің мәліметінше, ер адам Алматы облысының Ақтас кентіндегі жабық психиатриялық мекемеде жатыр. Әңгіме барысында ол журналистермен сөйлесуге қорқатынын айтты, себебі аурухана басшылығы оған сөйлеу қабілетінен айыратын арнайы инъекциялар жасауы мүмкін.
Сонымен қатар, ол мекеме қызметкерлеріне қатысты бірқатар айыптар айтып, сыбайлас жемқорлық фактілері, науқастарды ұстаудың тиісті деңгейде еместігі және басқа да бұзушылықтар туралы мәлімдеді. Сондай-ақ ер адам ауруханадағы тамақтың сапасы, жиһаздың жай-күйі және кейбір науқастардың негізсіз ұзақ уақыт бойы емделуі туралы айтты.
Бұдан бөлек, әңгіме барысында ол аурухана қызметіне қатысы жоқ тақырыптарды, оның ішінде Қазақстандағы заңсыз алтын өндіру және АҚШ президенті Дональд Трамптың реформаларын да қозғады.
Әзірге айтылған мәлімдемелердің ресми растауы жоқ. Дереккөздің мәліметінше, Қазақстан Денсаулық сақтау министрлігіне жағдайға қатысты түсініктеме беру туралы ресми сұрау жіберілген.
Еске сала кетейік, Николай Жұмағалиев оннан астам әйелді өлтіргені үшін кінәлі деп танылды. Оған «шизофрения» диагнозы қойылғаннан кейін ол мамандандырылған психиатриялық мекемеге мәжбүрлі емделуге жіберіліп, 1990-жылдардан бері сонда жатыр.