Зимбабве вице-президентінің бұрынғы жұбайы Мари Мубайва жеті жылға созылған соттан кейін қамаудан босатылды. Ол күйеуіне қастандық жасады деп айыпталған еді, деп хабарлайды infohub.kz сайты.
Мари Мубайваға 2019 жылы айып тағылған. Сол кездегі жұбайы, генерал Константино Чивенга оны Оңтүстік Африкадағы емделуіне кедергі жасады деп айыптады. Тергеу нұсқасы бойынша, ол Преториядағы ауруханада жатқан вице-президентті өлтіруге әрекеттенген. Кейіннен Чивенга Қытайға барып, төрт ай ем қабылдаған.
Мубайва қамауға алынып, оған кепілзат берілмеген. Мемлекеттік «Herald» басылымының мәліметінше, оны босату туралы шешімді шығарған магистрат сот барысында Мубайваның психикалық, дене және қаржылық тұрғыдан зардап шеккенін атап өтті. Бұл шешім мемлекет тарапы куәгерлерді тарту үшін істі бір айға кейінге қалдыруды сұрағаннан кейін қабылданды.
Адвокат бұл шешімді жеңіс деп атады, алайда оның тым кеш келгенін айтты: оның пікірінше, соттың созылуы клиентінің құқықтарын бұзған. Сейсенбі күні астана Хараредегі сот ғимаратының алдында сөйлеген қорғаушы, егер мемлекет жаңа сот процесін бастауды ұсынса, оған сол кезде жауап беретінін қосты.
«New Zimbabwe» жаңалықтар сайтының хабарлауынша, Мубайва сот алдында босатылуын атап өтіп, әділеттілік орнағанын және адвокатымен мақтанатынын жеткізді.
2017 жылы Константино Чивенга сол кездегі президент Роберт Мугабені биліктен кетіруге белсене қатысқан болатын.