Ресеймен шекарада Қазақстан аумағына ірі партия тауық жұмыртқасын заңсыз әкелу әрекетінің жолы кесілді: 20 тонна өнімі бар жүк көлігі елге кіргізілмеді, деп хабарлайды infohub.kz.
Республика Ауыл шаруашылығы министрлігінде айтылғандай, оқиға Батыс Қазақстан облысындағы «Сырым» ветеринариялық бақылау бекетінде болған. Ведомство қызметкерлері Самара (РФ) — Астана бағытымен келе жатқан жүк көлігін тексеру үшін тоқтатқан.
Тексеру барысында 20 тонна тағамдық тауық жұмыртқасын тасымалдау заңнамада көзделген ветеринариялық ілеспе құжаттарсыз жүзеге асырылғаны анықталды. Осыған байланысты көлік құралы жүкпен бірге кері қайтарылды. Жүргізушіге қатысты әкімшілік хаттама толтырылып, айыппұл салынды.
Тасымалдаушы өкілдеріне Қазақстан мен Еуразиялық экономикалық одақтың ветеринариялық заңнамасының талаптары түсіндірілді.
Ауыл шаруашылығы министрлігінде 2026 жылдың 21 сәуірінен бастап алты ай мерзімге үшінші елдерден және ЕАЭО мүше мемлекеттерінен барлық көлік түрімен тауық жұмыртқасын Қазақстан аумағына әкелуге тыйым салынғанын еске салды. Бұл шаралар өнімнің әкелінуін реттеуге және елдің ветеринариялық-санитариялық және эпизоотиялық тұрақтылығын қамтамасыз етуге бағытталған.