Қазақстан премьер-министрі Олжас Бектенов орман өртін сөндіруді үйлестіру үшін ТЖМ және Экология министрлігінің басшыларын Абай облыс орталығына шұғыл жіберді, деп хабарлайды infohub.kz сайты.
Премьер-министрдің бұйрығы бойынша, аймаққа төтенше жағдайлар министрі Шыңғыс Аринов және экология және табиғи ресурстар министрі Ерлан Нысанбаев дереу жолға шықты. Оларға «Семей орманы» резерваты аумағындағы өртті жою жұмыстарын басқару тапсырылды.
«Өрттің алдын алу және жақын маңдағы елді мекендерді қорғау шараларын күшейту тапсырылды. 16 шілде сағат 16:00-дегі жағдай бойынша өрт сөндіруге 400-ден астам адам және 100-ге жуық техника жұмылдырылды. 100 тоннадан астам су төгілді», — деп атап өтті үкіметте.
Жедел штабтың жұмысы үкімет басшысының жеке бақылауында.
Бұған дейін 16 шілде күні таңертең Абай облысының «Семей орманы» аумағында орман өрті шыққаны хабарланған болатын. Оны сөндіруге жердегі техника мен авиация жұмылдырылды. Кейін полиция «DosbolLike» балалар лагерінен өртке байланысты 190 бала мен 20 қызметкер эвакуацияланғанын нақтылады. Полиция қызметкерлері ТЖ аймағында қауіпсіздікті қамтамасыз етуді жалғастыруда.