Палестина Президенті Махмұд Аббас бұрын шығарылған, 2026 жылғы 28 қарашаға белгіленген парламенттік сайлау туралы жарлықты күшінен қалдырып, президенттік және парламенттік сайлау бір мезгілде — 2027 жылғы 11 қыркүйекте өтетінін бекітті, деп хабарлайды infohub.kz сайты.
Палестинаның WAFA ақпарат агенттігінің хабарлауынша, тиісті шешім Палестинаны азат ету ұйымы (ПАҰ) Атқару комитетінің қаулысына сәйкес қабылданған.
Жаңа жарлыққа сәйкес, құжат еркін және тікелей сайлау өткізуді көздейді. Дауыс беру барысында Иерусалимде, Иордан өзенінің Батыс жағалауында және Газа секторында тұратын палестиналықтар Палестина Президентін және Палестина Заң шығару кеңесінің депутаттарын сайлай алады.
Шешім палестиналық саяси партиялармен және күштермен жалпыұлттық консультациялардың қорытындысы бойынша қабылданғаны атап өтілген.
Сондай-ақ Израильдің әрекеттері сайлауды бұрын белгіленген мерзімде өткізуге кедергі келтіргені хабарланды. Осыған байланысты еркін, әділ және жан-жақты дауыс беруді ұйымдастыру үшін тиісті саяси жағдай жасау, қауіпсіздік пен жергілікті жерлерде қолайлы ахуалды қамтамасыз ету қажет.