Сан-Францискода (АҚШ) рингте адам мен машина кездесті: американдық блогер Фрэнки ЛаПенна EngineAI T800 андроидына қарсы шықты. Жекпе-жек әдетте роботтар арасындағы шайқастарды ұйымдастыратын REK шоуы аясында өтті, деп хабарлайды infohub.kz сайты.
Алғашында ЛаПенна роботты бірнеше рет ұрып, тіпті шегіндіре де алды. Алайда кейін T800 шабуылға көшіп, аяғымен бірнеше қуатты соққы жасады. Солардың бірінен кейін блогер еденге құлап, жекпе-жекті жалғастыра алмады.
Темір жауынгерді сыртқы түрі жағынан «Терминатордағы» T-800-ге ұқсатып, оған қорқынышты қызыл жарқыраған көздер қосқан. Жекпе-жек видеосы әлеуметтік желілерде тез тарады: Instagram-да ролик шамамен 2,8 млн лайк және 61,8 мың пікір жинады.
Жекпе-жек видеосы қызу реакция тудырды. Пайдаланушылар машиналардың көтерілісі туралы әзілдесіп, сонымен қатар бұл көрініс сәл үрейлі көрінетінін айтты.
«Бұл видео тарихқа бетбұрыс сәт ретінде енетін сияқты», «Мұның бәрі неге нашар идея екенін түсіндіретін алты фильм болмады ма?», «Біз қорқатын нәрсемізді тура өзіміз жасап жатырмыз», «Оларды жұдырықтасуға үйретпеңдер…», «Міне, осылай басталады», «Біз мұны неге қалыпты деп санаймыз?», – деп жазады комментаторлар.
Бақытымызға орай, машиналар көтерілісі әлі алыс сияқты. Жекпе-жек кезінде роботты VR көмегімен оператор басқарды, сондықтан T800 қайда соққы жасауды өзі шешпеді. Дегенмен қалай болғанда да рингке машина шығып, адамды нокаутқа түсірді. Демек, енді роботтар адамдардан тек жұмысты тартып қана қоймайтын болды.
Бұған дейін Kursiv LifeStyle Қытайдың Шыңжаң аймағында ИИ-аниматордың туристік алаңдардың біріндегі өнер көрсету кезінде баланы ұрғанын жазған. Оқиға видеоға түсіп, әлеуметтік желілерде тез тарады. Кадрларда роботтың каратэ тәсілдерін көрсету барысында баланы аяғымен тепкені көрінеді. Соққыдан кейін бала ішін ұстап, ауырсынудан отыра қалып, жылайды.