Қазақстан Президенті Әкімшілігінің мемлекеттік-құқықтық бөлімінің бұрынғы меңгерушісі Айдар Жарылғанов жаңа қызметке тағайындалды — ол Қазақстан Республикасының әділет вице-министрі болды. Тиісті қаулыға ел үкіметі қол қойды, бұл туралы министрлер кабинетінің баспасөз қызметі хабарлады, деп жазады infohub.kz сайты.
Еске салайық, осыдан бірнеше күн бұрын, 2 қазанда Мемлекет басшысы Қасым-Жомарт Тоқаев Жарылғановты Президент Әкімшілігінің мемлекеттік-құқықтық бөлімінің меңгерушісі қызметінен босатқан болатын. Осылайша, кадрлық ауысу бір аптаның ішінде жүзеге асты.
Ақорда сайтында жарияланған мәліметтерге сәйкес, Айдар Төлетайұлы Жарылғанов 1978 жылы Семей қаласында дүниеге келген. 1999 жылы «Семей» мемлекеттік университетін, 2001 жылы «Әділет» жоғары құқық мектебін бітірген.
2001–2007 жылдары Жарылғанов Мемлекеттік кірістер министрлігінде және Қазақстан Республикасы Қаржы министрлігінің Салық комитетінде қызмет етті.
2007 жылдан 2019 жылдың сәуіріне дейін ол Президент Әкімшілігінде жұмыс істеп, Президент Әкімшілігі мемлекеттік-құқықтық бөлімінің сарапшысы, кеңесшісі, инспекторы және сектор меңгерушісі қызметтерін кезекпен атқарды.
2019 жылдың сәуірінен 2023 жылдың қаңтарына дейінгі аралықта Жарылғанов Президент Әкімшілігі мемлекеттік-құқықтық бөлімі меңгерушісінің орынбасары қызметінде болды.
2023 жылдың 6 қаңтарында Мемлекет басшысының өкімімен ол Президент Әкімшілігінің мемлекеттік-құқықтық бөлімінің меңгерушісі болып тағайындалды.
Айдар Жарылғанов 2020 жылы «Құрмет» орденімен, сондай-ақ 2013 жылы Қазақстан Республикасының Құрмет грамотасымен марапатталған.