Ақмола облысының полицейлері металл қабылдау пунктінен ақша салынған сейфтің ұрланғанын ашты. Алайда күдікті ұсталғанша ұрланған қаражат толық жұмсалып кеткен, деп хабарлайды infohub.kz сайты.
Облыстық полиция департаментінің нақтылауынша, қылмыс 6 қыркүйекке қараған түні жасалған. Құқық қорғау органдарына металл қабылдаумен айналысатын кәсіпорын аумағынан ақша салынған сейф ұрланғаны туралы хабарлама келіп түскен.
Осы дерек бойынша полицейлер сотқа дейінгі тергеп-тексеру бастап, қажетті жедел-тергеу шараларының кешенін жүргізді.
Тергеу барысында оқиға алдында кәсіпорын қызметкерлері әдеттегідей ақшаны сейфке салып, үй-жайды жауып кеткені анықталды. Келесі күні олар сейфтің жоқ екенін байқап, дереу полицияға жүгінген.
Тергеу аясында тәртіп сақшылары оқиға орнының маңына орнатылған бейнебақылау камераларының жазбаларын зерттеп, аумақты қарап шықты, іздер мен саусақ іздерін алып, кәсіпорын қызметкерлерінен жауап алды.
Жүргізілген шаралардың нәтижесінде күдіктінің жеке басы анықталды. Ол 1978 жылы туған ер адам болып шықты. Тергеу әрекеттері барысында ол кінәсін мойындады.
Алдын ала деректерге қарағанда, түнде ер адам жабық кәсіпорынға кездейсоқ көз түсіріп, терезеден ішке кіруді ұйғарған. Үй-жайда жүріп, ол сейфті ұрлаған. Кейін қылмыскер оны ломмен ашып, ұрланған ақшаны жеке қажеттіліктеріне жұмсаған.
Қазіргі таңда полицейлер күдіктінің басқа да осыған ұқсас қылмыстарға қатысын тексеріп жатыр.