АҚШ-тың 25 штаты Дональд Трамп әкімшілігіне қарсы сотқа жүгініп, жаңа жаһандық тарифтердің күшін жоюды талап етті, деп хабарлайды infohub.kz.
Демократтар бастаған талап-арыз Халықаралық сауда сотына берілді. Талапкерлер АҚШ-тың 60 сауда серіктесінен әкелінетін тауарларға салынған 10% және 12,5% мөлшеріндегі баждарды заңсыз деп тануды, олардың күшін жоюды және төленген баждарды қайтаруды талап етуде.
Нью-Йорк штатының бас прокуроры Летиция Джеймс: «Жоғарғы сотта жеңіліске ұшыраған әкімшілік тағы да тарифтердің жаңа кезеңі арқылы отбасылар мен бизнеске салықты заңсыз көтеруге тырысуда», — деді.
Талап-арызда әкімшілік 1974 жылғы Сауда заңының 301-бабын қолданып, жеделдетілген тексерулер жүргізу арқылы соттар бұрын қабылдамаған баждарды іс жүзінде қалпына келтіргені айтылады.
Ақ үйде бұл айыптауларды жоққа шығарды. Әкімшілік өкілі Куш Десаи: «Америка Құрама Штаттары американдық сауда мен жұмысшыларға зиян келтіретін тәжірибелерді жою үшін өзінің заңды өкілеттіктерін пайдалануда», — деп мәлімдеді.
Бұл жаңа тарифтерге қарсы кем дегенде екінші сот ісі. Бұған дейін шағын бизнес өкілдерінің тобы да осыған ұқсас өтініш берген еді.