АҚШ армия хатшысы Дэн Дрисколл қызметінен кетті. Бұл туралы CBS телеарнасы хабарлады. Ол бұл қызметте шамамен 18 ай болған. Оның кетуіне Қорғаныс министрі Пит Хегсетпен айлар бойы жалғасқан қақтығыстар себеп болған. Дрисколлды президент Дональд Трамптың «дрон адамы» деп атайтын. Ол тарихтағы ең жас армия хатшысы еді. Ақ үй CBS-ке Дрисколлдың «Американы қайтадан күшті ету» бағдарламасын ілгерілетуде «өте тиімді» болғанын және әскери операциялар кезінде «үздік көшбасшылық» танытқанын айтты. BBC бұл мәселеге қатысты Ақ үйге, Пентагонға және армияға сұрау жолдады.
Дрисколл — соңғы кездері қызметінен кеткен жоғары лауазымды әскери тұлғалардың бірі. Оған дейін Әскери-теңіз күштерінің хатшысы Джон Фелан сәуірде кенеттен отставкаға кеткен еді. Сондай-ақ, армия штабының бастығы Рэнди Джордж, армия генералы Дэвид Ходн және генерал-майор Уильям Грин де қызметтерінен кеткен. Пентагонға келгеннен бері Хегсет оннан астам жоғары әскери офицерлерді, оның ішінде Әскери-теңіз күштерінің бас қолбасшысы мен Әуе күштері бас штабы бастығының орынбасарын қызметінен босатқан.
Дрисколл мен Хегсет арасындағы алауыздықтың мән-жайы белгісіз. Дегенмен, CBS-тің айтуынша, армия хатшысы Джорджбен жақын дос болған. Ал Джорджды Хегсет отставкаға кетуді сұраған делінеді. Армия хатшысы — АҚШ армиясының азаматтық басшысы, ол белсенді әскери қызметкерлерді, сондай-ақ Ұлттық гвардия мен резервтегі сарбаздарды басқарады. Дрисколл бұған дейін армияда қызмет еткен, 2007 жылы офицер атағын алған, кавалерия взводын басқарған және 2009 жылы Иракқа бірнеше айға жіберілген.
Армия хатшысы ретінде Дрисколл жаңа ұрыс технологияларын қолдауымен танымал болды, сондықтан оны Трамптың «дрон адамы» деп атады. Өткен жылы ол Ресей-Украина соғысын тоқтатуға бағытталған келіссөздерде маңызды рөл атқарды, шетелдік сапарларға шығып, Украина президенті Владимир Зеленскиймен кездесті. Ол сондай-ақ вице-президент Джей Ди Вэнстің жақын досы әрі серіктесі, онымен Йель заң мектебінде танысқан. АҚШ армиясын басқарған кезінде ол Трамптың Ұлттық гвардияны американдық қалаларға жіберу шешімінде маңызды тұлға болды. Сонымен қатар, ол Алкоголь, темекі, атыс қаруы және жарылғыш заттар бюросының уақытша директоры қызметін де атқарды.