АҚШ арнайы қызметтері Лондондағы АҚШ елшілігінің балаларға зорлық-зомбылық жасады деп күдіктелген қызметкерін Ұлыбританиядан жасырын түрде шығарып әкетті, деп хабарлайды infohub.kz сайты.
The Sun басылымының мәліметінше, операция ресми тұлғалар дипломаттың АҚШ-та жүрген ағасына қатысты тергеу бастағаннан кейін жүргізілген. Тергеу нұсқасы бойынша, ағасы дипломатқа балалар бейнеленген әдепсіз суреттер жіберіп отырған.
25 тамызда елшілік қызметкерінің пәтерінде тінту жүргізу кезінде американдық билік тыйым салынған материалдарды тапқан. Оны ұстағаннан кейін британдық билікке хабарламай, АҚШ әскери базасына жеткізген.
Газеттің жазуынша, 24 тамызда, ұстаудан бір күн бұрын, ұшақ Чикагодан Глостершир графтығындағы американдық контингент орналасқан Фэрфорд әскери базасына ұшқан. Келесі күні сол ұшақ Фэрфордтан ұшып, АҚШ Әскери-әуе күштерінің Довер базасына келіп қонған, содан кейін ол жерден ұшып, Чикагоның О’Хара әуежайына қонған. Бұл Boeing жүк ұшағы ретінде тіркелген.
Лондон полициясы мен британдық билік дипломат әкетілгеннен кейін ғана хабардар болған.
«Олар рейд жүргізген кезде, әсіресе материалдарды тапқанда Скотленд-Ярдқа хабарлауы керек еді. (...) Біздің ойымызша, оның орнына оны американдық әскери базаға жеткізіп, 4 мыңнан астам миль (6,5 мың км) жерге — ағасына қатысты тергеу жүргізіліп жатқан жерге жөнелтті», — деді дереккөз.
Жасырын операцияны Лондондағы елшілікті күзететін АҚШ теңіз жаяу әскері корпусының қауіпсіздік қызметкерлері жүргізген болуы мүмкін, олар дипломатты американдық әскери колонна құрамында базаға жеткізген.
Американдық елшілікте қызметкерге қатысты айыптаулар туралы хабардар екенін растады. Онда барлық қызметкерден мінез-құлықтың ең жоғары стандарттарын сақтауды талап ететінін және мұндай айыптауларға байыпты қарайтынын мәлімдеді.