АҚШ-тың Юта штатының судьясы Тайлер Робинсонды консервативті белсенді Чарли Киркті өлтірді деп айыптап, оны ауырлатпалық мән-жайлар бойынша сотқа тартуға болатынын шешті. Бұл іс өлім жазасын қолдану мүмкіндігін көздейді, деп хабарлайды infohub.kz сайты.
Судья Тони Графтың бұл шешімі сейсенбіде өткен тараптардың қорытынды ауызша пікірталасынан кейін қабылданды. Процесс барысында адвокаттар негізінен Робинсон кінәлі деп танылған жағдайда өлім жазасына кесілуіне негіз болатын ауырлатпалық мән-жайды талқылады.
«Бұл дәлелдемелерді айыптау үшін ең қолайлы тұрғыдан қарастыра отырып, қазіргі кезеңде олар айыпталушының Чарли Киркті атып өлтірген адам екенін негізді түрде болжауға жеткілікті», — деді судья Граф.
Сондай-ақ судья атыс кезінде басқа адамдарға да нақты және белгілі өлім қаупі болғанын анықтады. Бұл прокуратураға өлім жазасын көздейтін ауырлатпалық мән-жай бойынша айып тағуды талап етуге мүмкіндік берді.
Кирк отбасы атынан жасалған мәлімдемеде судьяның шешімі олардың әділдікке ұмтылуындағы маңызды қадам болғаны айтылады. «Бұл процестегі әрбір қадам Чарлидің өлімі оның отбасынан, әсіресе әкесіз өсетін балаларынан не алып кеткенін еске салады. Біз бір жыл бойы біз үшін дұға етіп, қолдау көрсетіп, қасымызда болған барлық адамдарға алғыс білдіреміз», — делінген мәлімдемеде.
Еске салайық, америкалық танымал консервативті блогер, Дональд Трамптың жақтаушысы Чарли Кирк 2025 жылдың 11 қыркүйегінде Юта штатында сөз сөйлеп тұрған кезде атып өлтірілген еді. ФБР күдіктінің ұсталғанын хабарлады. 12 қыркүйекте кісі өлтіру күдігімен 22 жастағы Тайлер Робинсон ұсталды.
12 желтоқсанда Робинсон алғаш рет сот алдына шықты. Айыптау тарапынан ұсынылған дәлелдемелердің ішінде Робинсонның үйінен табылған жазба бар, онда ол: «Менде Чарли Киркті жою мүмкіндігі бар, мен мұны жасаймын», — деп жазған. Сонымен қатар, Робинсонның бұл кісі өлтіруді достарымен чатта талқылағаны, ал қарудан оның ДНҚ-сы табылғаны хабарланады. Сондай-ақ, атыс жасалған шатырда оның аяқ киімінің ізі табылған.