АҚШ-та COVID-19 вакцинасы мен әскери қызметшілердің қазасы арасындағы ықтимал байланыс тергелуде, деп хабарлайды infohub.kz.
Politico басылымының дерегінше, әскери дәрігер Тереза Лонг сотта берген жауабында Денсаулық сақтау министрі Роберт Кеннеди-кіші және Қорғаныс министрі Пит Хегсетпен бірге әскерилердің қазасы мән-жайын анықтап жатқанын айтқан. Тергеу 2021 жылы президент Джо Байден барлық әскери қызметшілер үшін міндетті вакцинацияны енгізгеннен кейін басталды.
Лонг мемлекеттік жанама әсерлер туралы хабарлау жүйесінде тіркелген вакцинациядан кейінгі 2,5 мыңнан астам расталмаған өлім жағдайын зерттеп жатыр. Дәрігердің айтуынша, оған екпе салдарынан болуы мүмкін 28 өлім жағдайы белгілі.
Басылым Денсаулық сақтау министрі Кеннедидің COVID-19 вакциналарының белсенді қарсыласы екенін, оларды «ең қауіпті» деп атайтынын атап өтеді. Жақында ол американдықтардың көпшілігіне жыл сайынғы вакцинация туралы үкіметтік ұсынысты жойды. Сонымен қатар, вакцинация саласындағы көптеген сарапшылар министрдің пікірімен келіспейді.