АҚШ қарулы күштері Ирандағы нысандарға бірқатар зымырандық соққы берді. Хормозган және Хузестан провинцияларында бірнеше қала зардап шекті. Алғашқы мәліметтер бойынша, адам шығыны мен қираулар болған, деп хабарлайды infohub.kz сайты.
Иран көздерінің мәліметінше, Ормуз бұғазына кіре берістегі жағалаудағы Сирик қаласы (Хормозган провинциясы), сондай-ақ Хузестан провинциясындағы өндірістік орталық Ахваз, Рамшир және Эндимешк қалалары атқылауға ұшырады. Соңғысында Шелемче иран-ирак шекара өткеліндегі жолаушылар терминалына зымыран тиді. Алдын ала деректер бойынша, екі адам қаза тауып, іздеу-құтқару жұмыстары жүріп жатыр. Шекара өткелі әлі күнге дейін ашық.
Шиеленістің күшеюіне байланысты Кувейт әскері Иран аумағынан ұшқышсыз ұшақтардың шабуылына тойтарыс беру үшін әуе қорғаныс жүйелерін іске қосты. Кувейттің әуе қорғанысы әуе нысандарын сәтті жойды, тұрғындарға қауіпсіздік шараларын сақтауға шақырды.
Axios басылымының мәліметінше, АҚШ президенті жақын күндері Иранға қарсы әскери операцияны едәуір кеңейту мүмкіндігін қарастырып жатыр. The Wall Street Journal хабарлауынша, АҚШ Таяу Шығысқа арнайы операция күштерін, жойғыш ұшақтар мен қосымша медициналық персоналды белсенді түрде жіберуде. Америка мен Ұлыбританиядағы базалардағы стратегиялық бомбалаушы ұшақтар жоғары дайындық режиміне көшірілді. Сондай-ақ Вашингтон бомбалауды күшейту, Иранның энергетика нысандарына соққы беру және Ормуз бұғазы маңындағы аралдарды басып алу үшін құрлық әскерін жіберу сценарийлерін қарастыруда.