АҚШ құпия қызметі Иран мемлекеттік телеарнасы көрсеткен бейнероликке қатысты тергеу бастады. Бұл роликте АҚШ президенті Дональд Трамптың кенже ұлы Бэррон Трампқа қауіп төндіретін сөздер айтылған деп болжануда. Бұл туралы infohub.kz сайты хабарлайды.
CNN деректеріне сүйенсек, америка-израиль қақтығысының басында Иранның бұрынғы жоғарғы көсемі аятолла Әли Хаменеи мен оның отбасы мүшелері қаза тапқаннан кейін, радикалды ирандық БАҚ президент Трамп пен оның отбасына қарсы қауіп-қатер мәтінін бірнеше рет жариялаған. Бұған дейін елдің бірінші ханымы Мелания Трампқа қауіп төнген еді, алайда Бэррон алғаш рет жария түрде қауіп-қатер нысанына айналды.
Құпия қызмет өкілі Нейт Херринг: «АҚШ құпия қызметі бейнежазба туралы біледі және біздің қорғауымыздағы адамдарға қауіп ретінде қабылдануы мүмкін барлық нәрсені тергеп жатыр. Операциялық қауіпсіздік мақсатында біз қауіпсіздікті қамтамасыз етуге қатысты барлау ақпаратына қатысты мәселелерді талқыламаймыз», — деді.
Үш минуттық бейнероликте зорлық-зомбылыққа шақырулар айтылып, президент ұлы жиі болатын жерлердің стильдендірілген бейнелері көрсетілген. Роликтің соңында диктор адамдардың «біздің 10 миллион долларлық сыйлығымызды алуды асыға күтетінін» айтқан.