АҚШ-тағы сайлаушылар арасында өзін демократпын деп санайтындар саны артып, республиканшымын деп атайтындар азаюда. Бұл — Gallup сауалнама қызметінің соңғы тоқсандық деректеріне сүйенген хабарлама. Сауалнамаға қатысқан сайлаушылардың 49 пайызы, оның ішінде тәуелсіздер де, демократтарға жақын екенін білдірген. Ал республиканшыларды қолдайтындар тек 39 пайызды құраған.
Бұл көрсеткіш — 2024 жылдың төртінші тоқсанындағы республиканшылардың демократтардан төрт пайыздық артықшылығынан күрт өзгеріс. Сол кезде Дональд Трамп Ақ үйге қайта оралып, республиканшылар Конгрестің екі палатасын да жеңіп алған еді. Қазір демократтардың басымдығы — 2008 жылдан бергі ең үлкен көрсеткіш, сол жылы Барак Обама президент болып сайланған болатын. Бұл туралы New York Times басылымы жазды.
Бұл деректер Трамптың екінші мерзімі сайлаушылар арасында танымал болмай, кері реакция тудырып жатқанын көрсетеді. Трамптың рейтингі 2025 жылдың қаңтарындағы инаугурация кезінде 52 пайызды құраған еді. Алайда оның танымалдығы тез төмендей бастады: федералдық жұмысшыларды қысқартуы, бағаны көтеретін тарифтер енгізуі, ысырапшыл шығындар туралы заң қабылдауы және Иранмен ойланбастан соғыс бастауы — осының бәрі оның рейтингіне әсер етті. Қазір сайлаушылардың 58 пайызы оның жұмысын қанағаттанарлықсыз деп бағалайды, ал тек 38 пайызы мақұлдайды.
Демократтар Трамптың рейтингінің құлдырауын өз пайдасына жаратуға үміттенуде. Қарашада өтетін аралық сайлауда олар Өкілдер палатасын қайтаруы әбден мүмкін. Сенатты қайтару әлдеқайда күрделі, дегенмен сауалнамалар демократтарға оптимизмге негіз беруде.
Соңғы жылдары американдық сайлаушылардың ешбір партияға қосылмайтындар саны артып келеді. 2002 жылы Gallup сауалнамасына қатысқандардың үштен бірі ғана өзін республиканшы, демократ немесе тәуелсіз деп атаған. Өткен жылы бұл көрсеткіш 45 пайызға жеткен, ал тек 27 пайызы ғана демократ немесе республиканшы екенін айтқан.