Ақтауда апат болды: катер жартасқа соғылып, екі адам қаза тапты. Құтқарушылар операция барысы туралы айтып берді, деп хабарлайды infohub.kz.
Маңғыстау облыстық ТЖД төтенше жағдайларды жою басқармасының бастығы Бақытжан Өсеновтің айтуынша, кеме теңізден шығып тұрған жартас бөлігіне соғылған. Борттағы жеті адамның барлығы суға түсіп, әртүрлі дәрежедегі жарақат алған.
Іздеу-құтқару жұмыстары түнгі уақытта жүргізілді, бұл тапсырманы айтарлықтай қиындатты. Көп ұзамай суға батқан катер түбінен табылды. ТЖД қызметкерлері зардап шеккен бес адамды судан шығарды. Тағы екеуін іздеу ұзаққа созылды: олар жағадан шамамен 500 метр қашықтықта табылды. Екеуінің де құтқару кеудешесін кимегені анықталды.
Соңғы зардап шегушіні судан 02:34-те шығарды. Өкінішке қарай, екі адам қайтыс болды.
Сонымен қатар, Ақтаудағы катер жалдаумен айналысатын кәсіпкерлер Instagram-да үндеу жазып, сынған кеменің экскурсиялық емес екенін атап өтті. «Бұл катердің бізге еш қатысы жоқ. Бұл біз қонақтар мен туристерге жалға беретін серуендік катер емес. Катердегі адамдар — туыстар, бір отбасы. Менің түсінуімше, олар катерді суға түсіріп, өздері серуендегісі келген. Оны коммерциялық мақсатта пайдаланбаған. Өкінішке қарай, катер иесі де осы апатта қаза тапты. Теңіз қателіктерді кешірмейді. Әртүрлі қауесеттерге сенбеу керек. Бұл жалға алынған емес, олардың жеке катері еді», — деді олар.
Еске салайық, 30 тамызда Каспий теңізінің акваториясында бортта жеті адам болған серуендік катер жартасқа соғылған еді. Екі адам қаза тапты. Кейін дәрігерлер зардап шеккендердің жағдайы туралы хабарлады: «Төрт зардап шегушіге дененің бірнеше аймағының әртүрлі жарақаттары диагноз қойылды. Қазір төртеуі де ауруханаға жатқызылды. 1988, 2002 және 1964 жылы туған науқастар реанимация бөліміне жатқызылды. Олардың жағдайы ауыр, дәрігерлердің тұрақты бақылауында».