Ақтауда сот хирург дәрігерден сапасыз жасалған пластикалық операция үшін 3 млн теңге моральдық зиян өтемақысын өндіріп алды, деп хабарлайды infohub.kz сайты.
Маңғыстау облысы соттарының ресми Telegram-арнасында мәлім болғандай, Ақтау қаласының №2 соты әйелдің Қазақстан Республикасы Денсаулық сақтау министрлігі берген мемлекеттік лицензия негізінде хирургиялық қызмет атқаратын дәрігерге қарсы азаматтық ісін қарады. Талапкер материалдық зиянды өндіруді және моральдық зиянның өтемақысын талап етті.
Сот 2022 жылдың маусымында жауапкер талапкерге бет пішінін түзету бойынша пластикалық операция жасағанын анықтады. Алайда хирургиялық араласудан кейін пациенттің құлақ және бет аймағында тыртықтар пайда болып, жұмсақ тіндердің жағдайы мен сыртқы көрінісі нашарлаған.
Алғашқы ем жүргізілгеніне қарамастан, талапкердің денсаулық жағдайы жақсармады. Жағдайы нашарлағандықтан, ол басқа мамандарға жүгінуге мәжбүр болды.
2025 жылы әйелге Алматыда қайта түзету операциясы жасалды. Одан кейін оның бет нерві тармағының зақымдануы және жұмсақ тіндердің деформациясы байқалды. Осы медициналық салдарлардың нәтижесінде пациент ұзақ уақыт физикалық жайсыздық пен ауыр психологиялық азап шекті.
Талапкер сотқа медициналық қызметтердің сапасыз көрсетілуінен келтірілген 20 млн теңге материалдық зиянды, сондай-ақ 10 млн теңге моральдық зиян өтемақысын өндіру туралы талап қойды.
Іс материалдарын зерделеген сот материалдық зиянды өтеу туралы талапты қанағаттандырудан бас тартты, өйткені талапкер кейінгі емге жұмсалған барлық шығысты құжатпен растай алмаған.
Сонымен қатар медициналық қызметтердің сапасыз көрсетілуі салдарынан денсаулыққа зиян мен моральдық азап келтірілгені сот сараптамаларының қорытындыларымен расталды.
Анықталған мән-жайларды ескере отырып, сот талапты ішінара қанағаттандырып, жауапкерден талапкердің пайдасына моральдық зиян өтемақысы ретінде 3 млн теңге өндірді. Сот шешімі заңды күшіне енді.