Ақтөбеде 1981 жылдан бері жұмыс істеп келе жатқан станцияны алмастыратын жаңа кәріз тазарту құрылыстарының (КТҚ) құрылысы басталды. Бұл соңғы 45 жылдағы осындай ауқымды жоба, деп хабарлайды infohub.kz сайты.
Облыс әкімдігінің мәліметінше, жобаның құны шамамен 43 миллиард теңгені құрайды. Жаңа инфрақұрылым тек тозған жабдықты алмастырып қана қоймай, қаланың одан әрі дамуы үшін қуат қорын да жасауы тиіс.
Қолданыстағы КТҚ 45 жыл бұрын пайдалануға берілген, бүгінде оның тозуы шамамен 70 пайызды құрайды. Станцияға күн сайын 70-80 мың текше метр ағынды су түседі, ал тасқын кезеңінде бұл көлем 95 мың текше метрге жетеді. Сонымен қатар, Ақтөбе халқының тек 62 пайызы ғана орталықтандырылған кәріз жүйесімен қамтылған.
Жаңа станцияның қуаты жоғары болады: ол тәулігіне 100 мың текше метр ағынды суды тазартуға есептелген, ал ең жоғары кезеңде өнімділік 130 мың текше метрге жетуі мүмкін.
«Жобаны қаржыландыру мемлекеттік кепілдікпен Еуропа қайта құру және даму банкінің қарыз қаражаты есебінен жүзеге асырылады. Несиені өтеу және оған қызмет көрсету шығындарының 90 пайызына дейіні республикалық бюджеттен, тағы кемінде 10 пайызы жергілікті бюджеттен қамтамасыз етіледі. Осылайша, барлық қаржылық жүк тұрғындарға түспейді», – деді Ақтөбе облысының әкімі Асхат Шахаров.
«Aqtobe su-energy group» АҚ бас директоры Нағымжан Алдияровтың айтуынша, жаңа станцияда төрт деңгейлі тазарту жүйесі қарастырылған. Ол механикалық және биологиялық тазартуды, ультракүлгін сәулемен залалсыздандыруды және биогаз алумен тұнбаны қайта өңдеуді қамтиды. Тұнбаны кептіріп, түйіршіктерге айналдыру жоспарланса, биогазды электр энергиясын өндіруге пайдалану көзделуде.
Жоба аясында тазартылған су ағызылатын екі құбырды санациялау және герметизациялау да қарастырылған.
Құрылыс қазірдің өзінде басталды. Жұмыс көлемі ұлғайған сайын алаңдағы мамандар санын 350 адамға дейін арттыру жоспарлануда. Жобаны 2028 жылдың мамыр айында аяқтау көзделуде.
Жаңа станция іске қосылғаннан кейін тазартылған суды балық шаруашылығы мақсаттарында пайдалануға немесе экологиялық талаптар сақталған және қажетті жобалық құжаттама болған жағдайда су объектісіне ағызуға болады. Қолданыстағы КТҚ жаңа станция іске қосылғанға дейін жұмысын жалғастырады, одан кейін олардың одан әрі жай-күйі мен қайта құру қажеттілігі анықталады.