Ақтөбедегі «Жигер» құрылыс базарында өрт шығып, қала үстін қара түтін басты. Бұл туралы infohub.kz хабарлайды.
101 қызметіне Ақтөбе қаласы Астана ауданындағы «Жигер» құрылыс базары аумағындағы қойма үй-жайларының тұтанғаны туралы хабар түсті. Алғашқы бөлімшелер келгенде қойманың ішіндегі құрылыс материалдарымен ашық жануы анықталды. Оқиға орнына ТЖМ күштері мен құралдары дереу жетті. Өртті сөндіруге ТЖД жедел-құтқару жасағының құтқарушылары, Апаттар медицинасы орталығының мамандары, ТЖМ 20982 әскери бөлімінің әскери қызметшілері, сондай-ақ жергілікті атқарушы органдар, полиция департаменті, жедел жәрдем бригадалары жұмылдырылды.
Орнында жедел штаб құрылды. Ғимараттың конструкциялық ерекшеліктері өрт сөндіруді қиындатты: қойма металл конструкциялардан жасалып, профильді парақпен қапталған, шатыры ағаш жүйемен орнатылған.
Өрт сөндіру кезінде өрт сөндіруші Димаш Жетпісбай жанған ғимараттан кішкентай күшікті алып шықты. «Біз үшін әрбір өмір маңызды», — делінген ТЖМ хабарламасында. Сағат 19:01-де өрт сөндірілді. Зардап шеккендер жоқ. Өрттің себебі анықталуда.