Ақтөбеде полиция қызметкерлері жағдайы нашарлаған үш айлық нәрестесін ауруханаға жедел жеткізуге әйелге көмектесті, деп хабарлайды infohub.kz сайты.
Ақтөбе облыстық полиция департаментінің Instagram-аккаунтында айтылғандай, оқиға 29 қазанда болған. Сол кезде полицейлер қызмет үстінде еді және дәл уақытында дәл орнында болып шықты.
«Сәңкібай батыр даңғылы мен Газиза Жұбанова көшесінің қиылысында полицейлерге такси қызметінің өкілі жүгінді. Ол көлікте жағдайы нашарлаған үш айлық нәрестесі бар әйел отырғанын айтты. Кептеліс салдарынан олар медициналық мекемеге уақытында жете алмаған. Жағдайды бағалаған полиция лейтенанты Дархан Жұмабай мен аға полиция лейтенанты Нұрхат Сұлтан ана мен баланы ауруханаға өздері жеткізуге дереу шешім қабылдады», — деп сипаттады оқиғаны полицияда.
Әйелді сәбиімен бірге қысқа уақыт ішінде балалар ауруханасына жеткізіп, онда балаға қажетті медициналық көмек көрсетілді.
Полиция департаменті құқық қорғау органдарының қызметкерлері азаматтарға көмектесуге әрдайым дайын екенін еске салады. Бұл дереу әрекет етуді талап ететін жағдайларда ерекше маңызға ие.