2026 жылғы 25 шілдеден бастап Алматыда №61, 218 және 238 автобус бағыттарының қозғалыс схемасы өзгереді. Бұл шешімді қалалық жол қозғалысын және жолаушылар көлігін ұйымдастыру басқармасы қабылдады. Өзгерістер Саин көшесінің Рысқұлов даңғылынан Ақын Сара көшесіне дейінгі жаңа учаскесінің ашылуына, сондай-ақ Рысқұлов даңғылынан Мұстафин көшесіне дейінгі бөлікте қоғамдық көлікке арналған бөлінген жолақтың іске қосылуына байланысты, деп хабарлайды inbusiness.kz.
Түзетулер қоғамдық көліктің жылдамдығы мен тұрақтылығын арттыруға, сондай-ақ жаңартылған көше-жол желісін тиімді пайдалануға бағытталған. Өзгерістер тұрақты негізде қолданылатын болады.
Бағыттардың жаңа схемалары:
Маршрут №218
Оңтүстік бағытта: Мөңке би көшесі — Саин көшесі — Абай даңғылы — Яссауи көшесінен кейін бұрылыс — Абай даңғылы — соңғы аялдама «Б. Момышұлы метро станциясы». Кері бағытта: «Б. Момышұлы метро станциясы» — Абай даңғылы — Саин көшесі — Мөңке би көшесі — әрі қарай қолданыстағы схема бойынша.
Маршрут №238
Оңтүстік бағытта: Саин көшесі — Төле би көшесі — соңғы аялдама «Автостанция». Кері бағытта: «Автостанция» — Төле би көшесі — Саин көшесінен кейін бұрылыс — Төле би көшесі — Саин көшесі — әрі қарай қолданыстағы схема бойынша.
Маршрут №61
Оңтүстік бағытта: Абай даңғылы — Саин көшесі — Әл-Фараби даңғылы — соңғы аялдама «“Арман” автостанциясы». Кері бағытта: «“Арман” автостанциясы» — Жароков көшесінің айрығы — Әл-Фараби даңғылы — Саин көшесі — Абай даңғылы — әрі қарай қолданыстағы схема бойынша.